Sokuqhamuke ukuxokozela okukhulu emahofisni kamsitheli elizweni lonke jikelele abantu bezama ukuthatha ama-passport phambilini kokukhuphuka kwembadalo yawo ekuqaleni kwenyanga ezayo.
Umphathintambo obona ngezemali uMnu Mthuli Ncube wazise ngeviki edluleyo ukuthi kusukela mhlaka 1 ngoZibandlela, inhlawulo ye-passport ephuma ngemva kwamaviki ambalwa izakhwela isuka kumadola eMelika alikhulu lamatshumi amabili, US$120, isiya kumakhulu amabili amadola, US$200.
I-passport yesiphangiphangi ephuma ngemva kwamalanga amathathu yona ikhwele isuka kumakhulu amabili, US$200, yaya kumakhulu amathathu, US$300.
Lokhu sokudale ukunyakazela emahofisini kamsitheli endaweni ezinengi ezigoqela eHarare, koBulawayo eGwanda laseLupane, abantu bezama ukuthatha incwadi zokuhambisa inhlawulo ingakakhweli.
Abanye sebelala endwendweni bebambe indawo kodwa ngobunengi babantu, abanye baphenduka bengenelisanga ukufaka amaphepha abo.
Ukuze kuqedwe loludubo, uhulumende uthi amahofisi kamsitheli asezavulwa ekuseni ngehola lesikhombisa, 7 AM ayevalwa ngehola linye ntambama ngo7pm.
Umkhokheli wenhlanganiso emela abathengi eyeNational Consumer Rights Association uMnu Effie Dlela Ncube utshele iStudio 7 ukuthi ukuminyana kwabantu emahofisini kamsitheli bedinga ama-passport kuveza sobala ukuthi abantu abanengi bafuna ukubalekela udubo lweZimbabwe bayezama impilo kwamanye amazwe.
Forum