UMongameli Emmerson Mnangagwa namhlanje wamukele ugwalo lwempumela yophenyo olwenziwe yikomishini ebona ngezomhlabathi olwe Zimbabwe Land Commission Land Report. Likomishini ithi inanzelele ukuba kulohlupho olukhulu lokuba umhlabathi omnengi usezandleni zabesilisa ukwedlula abesifazana labasakhulayo.
Ugwalo lolu luveza ukuba abesifazana balomhlabathi ongaba yisilinganiso samatshumi amabili ekhulwini- 20%, kuthi abatsha belesilinganiso sokuhlanu okhulwini-5% kuphela. Abesilisa bona belesilinganiso sokungamatshumi ayisithupha ekhulwini-60%.
Ekhuluma emele uhulumende, uNkosikazi Tendai Bere ongumgcinisihlalo we Zimbabwe Land Commission uthe kuyadanisa ukuba abesifazana kabalamandla afana labesifazana okuphatheni umhlabathi.
"Kuphenyo lolu esilwenze okweminyaka emihlanu yikuba omama abanengi lokhe bengelawo umhlabathi lobanje bewufuna. Asibo bomama bodwa kodwa labatsha kabalawo umhlabathi."
UBere uthe abalimi babhekane lendubo ezinengi ezigoqela ukuswela imali emabhanga, ukungahlaliseki ngoba bengela ngwalo zokuba ngabanikazi amaphulazi ama title deeds esithi kumele lokhu kulungiswe.
Uthe uphenyo lolu lukhangele indlela umhlabathi ophethwe ngayo elizweni emaphandleni lasemapulazini aphiwa uzulu nguhulumende esithi lokhu kuzaphathisa ukuba uhulumende aphume lamacebo angenza ukuthi ilizwe lisebenzise umhlabathi ongasebenziyo.
UBere uqhubeke esithi ugwalo lolu lukhuluma ngendaba zabantu abalamaphulazi amanengi kodwa akazange acace ukuba kuyini abakukhuthaza ugatsha lwezokulima ekulungiseni udubo lolu.
Ugwalo lwempumela yaloluphenyo oluqhutshwe phakathi kweminyaka emihlanu edluleyo, luqhutshelwe uMongameli Mnangagwa, namhlanje, yenake olakho ukuba lwethulelwe umpakathi loba hatshi ngemva kokulubala.
Omunye umninipulazi wase Chivhu, uMnu Tatenda ZIndoga uthi kunzima ukuba abesiazana babe lomhlabathi.
"Okwenza omama abanengi behluleke ukuba lomhlabathi yikuba lokhe bengakabi lendlela zokuthenga umhlabathi njalo ukulima lokhe kukhangelwa njengebhizimusi labobaba. Kumele kuguqulwe lokhu."
Ingcitshi kwezokulima efundisa ekolitshini ye University of Zimbabwe uMnu Godfrey Sibanda uthi kumele uhulumende akhangelisise ulwazi lamacebo amunyethwe lugwalo lolu ukuze kuncedise ekutholiseni ilizwe isivuno eseneleyo.
"Lokhu okuphume kuphenyo lolu kumele kulungiswe njalo kubonakale ukuba labo abalomhlabathi bangabantu abanelisayo ukuwusebenzisa hatshi ukuba ube sebantwini abangelisi ukulimela ilizwe."
Ukuphathwa komhlabathi elizweni yindaba esegudwini selokhe ilizwe lasungula uhlelo lokwaba kutsha umhlabathi olwe Land Reform ngomnyaka ka 2000.
Kulamapulazi amanengi athathwa ngabe nsundu kodwa lokhe engasetshenziswa, ingcitshi zisithi kumele uhulumende abone ukuba amapulazi lawa ayaphiwa abantu abenelisa ukulima ukuze ilizwe lingabulawa yindlala.
Forum