Isibhedlela esikhulu seGwanda sesibhekane lodubo lokusilela kwabodokotela labongi, inengi labo esebetshiye umsebenzi eZimbabwe besiyadinga amadlelo aluhlaza kwamanye amazwe. Ukusilela kwezindlu zokuhlala kulesi sibhedlela lakho kubikwa kungokunye okuxotsha odokotela.
Lanxa isibhedlela seGwanda Provincial Hospital kumele sibe labodokotela abalitshumi lasikhombisa, 17, okwamanje kulabayisithupha kuphela.
Lokhu kuvele namuhla ngesikhathi umphathintambo obona ngokwenzakala eZansi yeMaNdebeleni uNkosikazi Evelyn Ndlovu esethekelela lesisibhedlela ukuze ebone ukuthi sisebenza njani.
Udokotela Shadreck Gororo, okhulume emele umqondisi wesibhedlela lesi uthi lanxa sekulengcwethi zabodokotela eGwanda Provincial Hospital, kunengi okusilelayo.
“Udubo lokusilela kwezindlu lapha kuliqiniso,ngithemba lizibonele libhoda lapha ukuthi izindlu esilazo zilutshwane nxa siqathanisa lezisebenzi esilazo lapha,lesi ngesinye sezizatho esidala ukuthi singatholi inani labodokotela esilifunayo, okwamanje silabodokotela abayisithupha kuphela lanxa kumele sibe labalitshumi lasikhombisa kungexa yodubo lwezindlu, silakho ukuthi silethe ingcwethi zabodokotela kodwa udubo yikuthi akula lapho abangahlala khona.”
UGororo uthi ngaphandle kokusilela kwabodokotela, abongi labo abeneli ngoba inengi seliphuma elizweni ngobunengi lisiyadinga amadlelo aluhlaza emazweni aphetsheya afana leBhilithani leMelika.
“Abongi abanengi sebesukile kuleli kuthi abanye ngabatshiya umsebenzi kungakho silodubo lokusilela kwabongi kanye labongi ababelethisayo nxa sikhangele abantu okumele sibancedise kungakho kuyadingeka ukuthi kudingwe abanye.”
Ngemva kokuzwa lokuzibonela umumo olapha, umphathintambo obona ngokwenzakala eZansi yemanNdebeleni uNkosikazi Evelyn Ndlovu uthe kuyadanisa ukuthi isibhedlela lesi sibhekane lengxaki zonke lezi ezigoqela ukusilela kwemitshina yokusebenzisa lanxa iGwanda ihlezi phezi kwenotho yegolide elenjiwa ngamankampani amanengi.
“Sisuka lapha sizafundisa uzulu kanye labosomabhizimusi ngokuqakatheka kokupha, kuqakathekile ukuthi sibekwazi njengezizalwane zakuleli ukuze sigcwalise inkulumo kaMongameli ethi ilizwe lakhiwa ngabanikazi balo, yiloba yini edingakalayo ezibhedlela kasihlanganeni njengezizalwane zakuleli , njengabalimi , njengezimbamgodi ukuze sibambisane lohulumemnde kulokhu okudingakalyo , kungaba yimitshina kumbe izindlu.”
Forum