Abakumsebenzi wokucebisa ngezempilakahle yenqondo, oweCounceling bathatha leli thuba lokuqinisa umkhankaso wokuqhuqhuzela ngempilakahle yabesilisa.
Bathi njalo ukungaphili kahle emcabangweni kungabe kubangelwa yikungamanga kuhle kwesimo somnotho okudala ukuba abesilisa bahlulukelwe lapho sebesehluleka ukuphandela imuli zabo.
Ingcwethi zezempilakahle zithi umkhuhlane wengqondo ubonakala ngokuzizwa umuntu edanile, ekhathezekile okwesikhathi eside, ukuzehlukanisa kumdeni kumbe kubangane, ukungadli loba ukuswela ubuthongo. Ukuzizwa nje umuntu ephangisa ukucaphuka, esiba lolaka aze acabange ukuzibulala, kanye lokusebenzisa izidakamizwa loba ukunatha kakhulu utshwala.
Umnumzana Mthandazo Ndlovu oqeqetshe ku Drug and Substance Abuse course, Accredited Addictions Counsellor Diploma, Adolescent Accredited Diploma kanye le Professional Diploma in Counseling uchasisa kabanzi ngempilakahle yengqondo.
“Mental illness, uyathola ukuthi umuntu uyazizwa sedinwa nje yikucabanga, azisezwe sephelelwe. Siyathola ukuthi umuntu lo ube abuser utshwala loba ama drugs. Umuntu wakhona uba lokukhathazeka kakhulu, azizwe sele stress njalo kasakwanisi ukuthi acabange positively. Nxa sisithi umuntu ule mental sound mind, kala kukhathazeka engqondweni ngumuntu othi nxa kufika ama new challenges, uyawabona ukuthi ngama new challenges njalo adinge indlela zokuthi izinto lezi ngingaziguqula njani ukuze zingihambele kuhle.”
Uqhubekela phambili uNdlovu ekhuthaza abesilisa ukuba badinge usizo nxa sebethe bafika ekuphelelweni yimicabango ephathelane lesimo abahlangane laso.
"Lapha sesibonile ukuthi abanye abantu bacina bezibulala, ama suicide cases sesiwabona kakhulu ebantwini abangobaba. Njalo futhi lokubulalana sokukunengi ngenxa yengqondo ezingasathathi kuhle. Abantu abanengi bafile, basemajele ngenxa yalokhu. Kasikukhangele kakhulu thina obaba, sizibuze ukuba yikwiyini osokungehlela, sidinge i professional health ukuze izinto zisihambele kuhle.”
Unkosikazi Lois Masuku okunhlanganiso eye Africa Institute for Ending Bullying, Depression and Suicide uthi lolu dubo kwabesilisa lusukela ekukhulisweni komtwana ongumfana emakhaya lezikolweni ngoba engafundiswa ukudinga usizo nxa sethe wahlangana lesimo esikhanya siphezu kwamandla akhe.
"Ukukhuliswa lomtwana ongumfana kwehlukene lokomtwana oyinkazana, lokubunjwa komtwana ongumfana kwehlukene lokomtwana oyinkazana nxa sikukhangele sibona ukuthi umntwana oyinkazana engaba leproblem uyakhala kumbe akhulume lomunye umuntu. Kodwa ongumfana uyakhuliswa etshelwa ukuthi wena uyindoda zibonele but ayisiwo wonke amaproblems angakwanisa ukuthi awasolve eyedwa kubangcono nxa etshelwe omunye umuntu.”
Isakhamuzi sakoBulawayo umnunzana Greater Sibanda uthi abesilisa nxa bethe bayahlukunyezwa ngomkabo bafela ngaphakathi.
“Obaba isikhathi esinengi bangathi balomoya onzima sibili ukuthi ekuncedeni. Emzini lapha bayahlukuluzwa kakhulu ngomama nxa behlukuluzwa ngomama kakhulu kodwa ubaba ukuthi asukume akhulume ngakho kunzima kakhulu kumthathela isithunzi sakhe lezi ngezinye zezinto ezenza ukuthi bacine befuthelana ngaphakathi lokhu kwenza ukuthi impilakahle zabo zisibanzima abanye becina besifa”
Umnumzana Thomson Maseko isiphathamandla senhlanganiso eye Padare/Enkundleni Men’s Forum on Gender ekhangele iMatabeleland North, ukhuthaza abesilisa ukuba bayemangala kwabomthetho nxa bebhekane lokuhlukuzwa.
“Bakhona obaba abahlukuluzwa ngumama, mhlawumbe yikho okubangela ukwanda kwenani labobaba abazibophelayo. Bona ke bakhala ngokuthi bayahlekwa nxa besiya mangala. Kodwa siyabonga uhulumende ngigatsha lwe Victim Friendly Unit olwamukela ukuhlukuluzwa kwabobaba ngendlela efanayo lokuhlukuluzwa kwabomama. Obaba abaselaso isizatho sokufela ngaphakathi.”
Kunyanga ephelileyo kunanzwa usuku olwe World Mental Health Day olukhona minyaka yonke mhla zilitshumi kunyanga kaMfumfu, esibhedlela seIngutsheni esiyiso esikhangela ababhekane lesimo sokuhlukumezeka engqondweni koBulawayo, umqondisi wesibhedlela lesi udokotela Nemache Mawere ubike ukuba sebesamukela izigulane ezedlula inani elijwayelekileyo esithi inani eliphezulu ngelabesilisa. Wapha umzekeliso wokuba kweyinye ikamuli bebelemibheda engamatshumi ayisikhombisa lasithupha (76) kodwa khathesi ilezigulane eziphose zifike amakhulu amabili(180).
Ngaphandle kwalezo zigulane lesi sibhedlela silezinye ezelatshwa zivela emakhaya ezingamakhulu ayisithupha lengxenye (650). Abesibhedlela lesi bakhala njalo ngokuthi imuli zezigulane azibaphi sekelo oludingakalayo lapho umuntu eselatshwa. Inhlanganiso eye World Health Organization ibika ukuba emhlabeni wonke jikelele phakathi kwabantu abayisitshiyagalombili (8) oyedwa wabo kaphathekanga kuhle engqondweni.
Forum