Izakhamizi zaseHwange zikhala ngobude bomango ohanjwa ngabantwana bemaphandleni, abaqalisa ukuya esikolo esibangeni seEarly Childhood Development (ECD).
Inengi lalaba bantwana lihamba umango owedlula amakhilomitha amahlanu ukufinyelela esikolo, phezu kokuba lindawo ihanqwe zindawo ezigcinelwa inyamazana zendle ezingabahlasela.
Lanxa imfundo seyenziwa yaba yimfanelo kuye wonke umtwana kusukela koleminyaka emine, abazali kanye lenkokheli zakulumango zithi uhulumende ngabe imfundo yaboECD le, wayisungula okusemthethweni ngemva kokwakha izikolo duzane lemizi ukuze kwehliswe imango emide ehanjwa yilaba abaseluchago.
Ukhansila ka Ward 6 uNkosikazi Nolia Gumede emangweni weMilonga uthi kunje abantwana abanengi kabasayi ezikolo nsuku zonke.
“Kuward engikhona oECD kusukela kuShantani kusiya eSisiatu, bahamba amakhilomitha adlula amahlanu umntwana omncane esiya esikolo ngoba bafunda eNdimankule kuward ye Chikandakubi. Ahambe umntwana seven kilometers ezama ukuya esikolo, besicela kube lokuyizikolo okuncane umntwana aqalisele khonapho esiya kwezinkulu.”
Ukhansila weKachechete, uMnumnzana Givemeagain Moyo uthi inengi lababantwana bakaECD kalikaqini ngakho kucina kusiba ngumthwalo womzali ukubeletha ingane emhlane emusa esikolo phinde amhlangabeze.
“Ngoba umntwana nxa sesuka endaweni ekhatshana esiya esikolo kuye kuyabe kungamphathi kuhle ngoba ufika sekhathele, ngakho kusiyisifiso sethu ukuthi kuvulwe ama education centers ikakhulu ku ECD ukuze umntwana nxa esemncane engasizondi isikolo njalo kungabingumthwalo womzali.”
Omunye wabathwele lumthwalo nguNkosikazi Ethel Sibindi waseMilonga othi uqukula umntwana ngovivi emusa eNdimankule.
“Kunzima. Kunje uvuka laye ngo 5 lithathele lizeliyefika ngobo 7, uhamba ekhala, akhubeke awe angcole phezu kwalokhu ufika ahle alale eklasini ngoba uyabe ediniwe kodwa awungeke umekele ngoba kugcwele impisi lezilwane okuyingozi emuntwini.”
Uhlupho lolu lubikwa lungabhahanga emangweni weHwange, kodwa luyimvama esigabeni sonkenje seMatabeleland North.
Lokhu kufakazwa njalo luphenyo olwenziwa ngabe Zimbabwe Vulnerability Assessment report yomnyaka ophelileyo, besithi abantwana abangaba yisilinganiso samatshumi edlula amahlanu ekhulwini 53.3% esabelweni lesi baphelela emfundweni ephansi eyePrimary kuthi ihlekana nje elingayindawo yilo eliqeqetsha lifike kumfundo yekolitshini.
Umphantintambo weMatebeleland North, uMnumzana Richard Moyo uyakusekela lokhu, kodwa ethi ingqobe ikumakhansila ngoba kuyilapho okumele kusetshenziswe imali zeDevolution Funds.
“Yizo imali ezisebenza into ezinjalo ukuthi nxa bebona isikhenxa bephume lama resolution ukuthi imali ingabuya beyeyakha iECD eseduzane lemizi ukuthi abantwana bengahambi imango emide, njalo lakhonokho ukuthi abantwana abanengi baphelela eprimary kuyikuthi ama secondary schools ayabekhatshana abantwana becine bedonda ngoba kulenyamazana, izingebenga lokudlwengulwa so imali zedevolution yizo ezivala izikhenxa zonezo.”
Kunje amakhansila athi esiqintini seBinga kumpumela ye Zimsec yomnyaka odluleyo, izikolo ezilitshumi lathobamunwembili zaswela ngitsho umfundi oyedwa owafinyelela ukwedlulela phambili ngemfundo ngemva kwempumelela eye ‘O’ Level.
UMoyo uthi ukuze kwehliswe uhlupho lolu, uhulumende ngaphansi kohlangothi lwezemfundo ephansi usehlale phansi waphuma lecebo lokuthi kwakhiwe ezinye izikolo zeSecondary ezinengi ezigabeni zonke zeMandebeleni ngenyakatho langezansi, ngemva kokunanzelela ukuba izigaba lezi ziyasilela kwezemfundo nxa ziqathaniswa lezinye izabelo, okuyikho okwenza izinga lokuqeqetsha liqhubeke lisehla.
Forum