Ozibiza ngokuthi ngunobhala jikelele webandla leCitizens Coalition for Change uMnu. Sengezo Tshabangu uthi abazancintisa kukhetho lwama by-elections bemele i-CCC ngenyanga ezayo bazakhweza amaphepha abo emthethwandaba we nomination court ngoMvulo
Lokhu kulandela isinqumo somthethwandaba ophakeme izolo esokuthi amanye amalunga ebandla leCCC awe Senate, ephalamende, lamakhansili axotshiswe nguMnu. Tshabangu ngempela asephelelwe ngumsebenzi.
Ibandla leCCC lithi uMnu. Tshabangu kalamvumo yokwenza lokhu kodwa yena uthi umthethwandaba usumphile limvumo njengoba abamphikisayo behlulekile ukuchaza izizathu eziqinileyo zokumphika.
Abanye abalungiselela lokukhetho abathi bazancintisa bagoqela ibandla leZANU PF, ZAPU, lamanye amabandla.
UMnu. Tshabangu, uthi uluhlu lwamabizo alabo abazancintisa luzavezwa ngoMvulo njalo labo abazehluleka ukukhweza amaphepha bazakwenzenjalo ngoLwesibili ekuseni.
Siphinde saxoxa loMnu. Promise Mkhwananzi, isikhulumeli sebandla leCCC yena ogcizelela ukuthi ibandla lakhe alisoze liphatheke kulolukhetho ngoba lungekho emthethweni. UMnu. Mkhwananzi uthi abantu bengahambeli phambili umanyano weSADC ngoba ungakathathi isinqumo esipheleleyo ngempumela yokhetho lweZimbabwe.
Forum