Umthethwandaba waphezulu owe High Court uhlale namhlanje okwakuqala usahlulela udaba olukhweze libandla leCitizens Coalition for Change (CCC) lokuphikisa ukuxotshiswa kwamalunga alo edale lephalemende ngozithi usaphethe isikhundla sokuba ngunobhala jikelele weCCC, umnumzana Sengezo Tshabangu.
Abasekeli be CCC kade behlabela phandle kwedale le High Court befuna ukubona uTshabangu yena okade engekho emthwethwendaba Ngolwesithathu.
Abe CCC bathi bazakhangelana lo Tshabangu yedwa emthethwandaba ngoba nguye owenze ukuba amalunga awe CCC exotshwe ephalamende. Bathi njalo usomlobo wephalamende uMnu Jacob Mudenda lo Mongameli we Senate uNkosikazi Mabel Chinomona kumele bakhitshwe kusicelo sabo sokuba uTshabangu kenzanga okusemthethweni ngokuxotsha amalunga alo awe CCC.
Igqwetha le CCC uNkosikazi Sihle Amanda Ndlovu utshele intathelizindaba okwenzakale emthethwandaba esithi balethemba ukuba bazanqoba.
"Sesilwenzile udaba lolu njalo sesimelele impumelele. Siyathemba ukuba kuzaphuma kuhle kodwa sokusele emandleni omthethwandaba ukuba sazi ukuba kuhamba njalo "
Ibandla leli liphinde lathi kalimazi uTshabangu lisithi kumele aphe ubufakazi ukuba uzithi ungu Nobhala we CCC owakhethwa ngaphi loba ngubani.
Igqwetha lika Tshabangu uMnu Nqobani Sithole uthi batshele umthethwandaba ukuba uTshabangu ungu nobhala we CCC esithi wonke umuntu we CCC uyamazi uTshabangu.
"Sifikile enkantolo sonke sizizwele ukuba sisebenze ngobunono obukhulu. Kulabantu abathi kabamazi sitshele idale ukuba, ngamanga lawa. ICCC ikhokhelwa ngu Chamisa ebambeni lo Tshabangu bayamazi "
Kodwa umsekeli wesikhulumeli se CCC uMnu Gift Ostallos Siziva uthi kabamazi uTshabangu esithi bayathaba ukuba udaba lolu luzawakala idale le
"Kusobala ukuba okuzaphuma edale kuzahambelana lalokho esikufunayo. Njalo siyathaba ukuba udaba lolu luzwakala inomination court ingakahlali ngolwebili "
Ingcitshi kwezombusazwe esebenza lebandla le Ideas Party for Democracy uMnu Hebert Chamuka uthi akathembi ukuba iCCC izanqoba kukhetho.
"Indaba le angiboni ukuthi izaphela kuhle. Udaba lolu luzaphelela kuma by elections, nxa kwenziwa yi ZANU PF kutsho ukuba izaphelela edale "
UMahluli Munamato Mutevedzi owe High Court uthe uzakupha isinqumo sakhe kudaba lolu kumalanga alandelayo, idale eleNomination Court lingakahlali mhlaka 7 Lezi, lingakemukeli amaphepha alabo abazafuna ukuncintisa kukhetho lwamaBy-elections abazathatha izikhundla zalabo abaxotshiswe ephalamende. Umongameli Emmerson Mnangagwa sowabeka leli langa lokhetho ukuba lwenziwe mhlaka 9 Mpalakazi lonyaka.
AbeCCC) baguqule amaphepha abo wokukhweza loludaba emthethwandaba bekhipha usomlomo wedale le National Assembly, umnumazana Jacob Mudenda lo Mongameli wedale le Senate uNkosikazi Mabel Chinomona kudaba lwabo lolu, kodwa kabazange baveze isiizatho sokwenza lokhu.
Udaba lolu luza ngemva kokuba uTshabangu elobele idale lephalamende ngenyanga edluleyo exotshisa amalunga aweCCC edale ele National Assembly alitshumi lane-14 labe Senate abayithobamunwemunye-9. Abebandla le CCC bathi kabamazi njalo bafuna umthethwandaba wesule isinqumo sakhe lesi.
Forum