Inhlanganiso ebona ngokulondolozwa kwezwemvelo eye World Wildlife Fund for Nature-WWF igqibe umhlangano owenkokheli yengatsha zikahulumende leyomdabu, eyemangweni oweHwange le Binga, njengongo yokuzoxoxisana ngendlela ezingaphathisa izakhamizi esingcelane lezihonqo zemanyamazana zendle.
Lokhu kwenziwa ngemva kokunanzelela ukuba sebebanengi asebelahlekelwe ngumpefumulo, izifuyo, amabele abanye njalo betshiywa sebekhubazekile ngemva kokuhlaselwa zinyamazana lezi.
Bathi inhloso yabo izakhamizi ngenhlelo abafisa zenziwe ukuzivikela lapho sokuqhamuke ukufuthelana phakathi kwazo lenyamazana ngasikhathi sinye lezo ndlela zivikela lokulondoloza imvelo phansi kwendikimba ethi ‘Nature Based Solutions.’
Umqondisi wohlelo lolu ekuhlangothi olwe Agro-Ecology eWWF, uMnumzana Hlengani Dube uthi baqoqe abomdabu ukuba bezwe kibo inhlupho abahlangana lazo ngezemvelo ezigoqela inyamazana, izihlahla lokulondolozwa kwamaxhaphozi.
“Esikufisayo yikuthi omama labanye nje abakhangele imizi emakhaya ukuthi bebekhona sivuselela imiganga , amaxhaphozi lalapha abahlala khona emakhaya bezame ukuhlanyela izihlahla."
Inkokheli zomdabu ebezikulumhlangano zamukele ngenjabulo loluhlelo, kodwa zilesicelo sokuthi nxa kuvuma, inhlanganiso le iqale ngokubiya izihonqo zasendle, besithi kunje imikhuhlane phakathi kwezifuyo lenyamazana zendle isibhahile kungenxa yokudlelana kanye lokunathelana phakathi kwabantu lezinyamazana lezi emachibini.
Induna uSinamagonde weBinga uthi phezu kwemikhuhlane le, basengcupheni njalo yokulwisana kwenyamazana labantu athi lokhu kubangelwa njalo yikukhuphuka ngasikhathi sinye kwenani labantu lenyamazana.
“Abantu kumele bezuze amanzi abo, inyamazana lazo zodwa. Kubuye kubelocingo ezakwehlukanisa inyamazana labantu, khathesi inyamazana ingacabanga ukuyale iyahamba, lomuntu engacabanga ukuyale uyahamba yikho libona lemikhuhlane ezifuyweni simnengi.”
Olibamba lenduna uMvuthu uMnumzana Bishop Matata Sibanda laye ukhala ngokulwisana lokhu, ethi indlovu, impisi kanye lezilwane zibathwalele ubhulo.
“Yen’ us'phila ndawonye lo nguye olento yonke luhlupho. Sekuthi ngazihlala le, lathi le. Loba ulima uyazibuza ukuthi ngizavuna, nxa ungakavuni awusoze uvume.”
USibanda uthi lokusabela kwabelusi bazo abe Zimbabwe Parks and Wildlife Management Authority kuntengentenge nje.
“Esikhathi esinengi bafika sekonakele, ngoba ungaze ubabize ukuthi buyani khathesi kwesinye isikhathi bayathi asilamota. Ngaphandle kokuthi bengabakhona esesihlala labo abazabuya kulinywa sizwe sivune, lapho singavuma.”
UMnumzana Xolelani Ncube obona ngezemvelo esekhansilini ye Hwange Rural District Council uthi abahlali abangcelezelane lesihonqo se Hwange National Park bathwele nzima ngokuhlala bedlelwa izifuyo, izilimo kanye lokunatha amanzi angahlanzekanga abawanathisana lenyamazana lezi.
Uthi kunje ngokukhulu besihonqo lesi, asila ngitsho umfula ngakho inyamazana zichapha zisiyanatha emfuleni yabo Deka, Gwayi leMatetsi okuyikho okumemethekisa imikhuhlane.
“Nxa kubuya inyamazana ezinjengenyathi zithwele imikhuhlane enjengabo foot and mouth so ukuhlangana lokhu imikhuhlane le ibamba abantu, izinyamazana icine isimemetheka kakhulu.”
Omunye njalo umqondisi wezemvelo kuhlangothi lwe Environmental Management Authority uNkosikazi Chipo Zuze uthi phezu kwalokhu bafisa uhlelo lolu lukhangele ezokuvuselelwa komganga kanye lokulondolozwa komkhathi ikakhulu eHwange athi ngokwembiwa kwamalahle, umkhathi uqhubeka uphambaniseka.
“Khonokho kuletha inhlupho ezifana lokungcoliswa komkhathi so inhlelo ezibuya ngokuthi umkhathi uhlanjululwe siyazikhuthaza.”
Kodwa abeEMA bathi inkokheli zomdabu kumele zidlale indima enkulu ukuze uhlelo lolu luphumelele ngokugweba laba abephula imthetho yokulondoloza ezigabeni abazimeleyo okufana lokutshisa amaganga, ukugamula mahlayana izihlahla kanye lokubhidliza incingo zezihonqo.
Abe WWF bathi uhlelo lolu lusazodluliselwa kuzakhamizi zezigaba lezi lazo zethule eyazo imibono, qede besungule uhlelo lolu oluzaqhutshwa okweminyaka emithathu.
Lokhu bakwenza bebambisane lohlangothi lwe Canadian International.
Forum