Amalunga edale lephalamende awebandla le Citizens Coalition for Change (CCC) namhlanje baphendukile edale leli lapho uMongameli Mnangagwa evula isakhiwo esitsha sedale leli, esiseMount Hampden.
Abe CCC bathi bahambile edale NgoLwesine, besithi njengoba esedlule amaviki amabili ababewehlelile ukuthi bazake beme umsebenzi bekhonona ngokuxotshwa kwabo.
Amalunga awe CCC lawa aphendukile ephalamende besithi ukutshengisela kwabo ngokuxotshwa kwabanye babo ephalamende ngozithi ungunobhala webandla leli uMnu Sengezo Tshabangu sokufike emaphethelweni.
Omunye wamalunga lawa awe CCC, uMnu Gift Ostallos Siziba ongumsekeli wesikhulumeli saleli bandla uthi babuyele emsebenzini ngemva kokunanzelela ukuba udaba lolu solusemthethwandaba sikhuluma kanje.
Uqhubeke esithi ibandla leli liyaqhubeka likhulumisana lozulu ukuba bathathe manyathela bani njenge ndlela yokulungisa abathi yikuntshontswa kwamavoti abo ngu Tshabangu.
Kodwa isikhulumeli sika Tshabangu uMnu Khaliphani Phugeni uthi amalunga awe CCC ahambe ephalamende namhlanje ngoba esesaba ukuxotshwa ngu Tshabangu othe amalunga wonke owe CCC akabuyele edale.
Amalunga awe CCC aphume edale mhlaka 11 wayonale inyanga kaMfumfu, ngemva kokuxotshwa kwabanye babo ngu Mnu Sengezo Tshabangu.
Kusenjalo, uMongameli Mnangagwa uvule okusemthethweni NgoLwesine, isakhiwo sephalamende yeZimbabwe esiseMount Hampden okuyindawo umuntu angena kiyo ephuma eHarare eqonde eKaroi.
UMongameli Mnangagwa ubike ukuba idale lephalamende leli lakhiwa ngabe China, kungela mbadalo esithi lesi yisipho esivela kubangabangane boqhobo be Zimbabwe.
UMnangagwa wazise njalo ukuba kunje ele China lincedisa ukuvuselela isititshi samandla ka getsi ese Hwange lokuba kwakhiwe igceke le ndizamtshina ele Robert Mugabe International airport.
Ingcitshi kwezombusazwe zithi ele Zimbabwe kumele linanzelele indlela elisebenza ngayo lamazwe afana le China. Eyinye yalezi ngcwethi esebenza lenhlanganiso ye Zimbabwe Institute of Democracy nguMnu Liberty Sibindi.
Isakhiwo lesi silamakhamuli amahofisi amalunga wonke awedale lephalamende, indawo zokudlela zamalunga lawa, inkamba yamapholisa, lendawo yokuhlala amalunga ehlanganela ukuhlaziya indaba ezithile zomsebenzi weHouse of Assembly leSenate.
Abakade besemkhosini wanhlanje bagoqela ummeli we China e Zimbabwe, uMnu Zhong Ding, abaphathintambo bakahulumende lamalunga amadale aweHouse of Assembly leSenate.
Forum