HWANGE —
Izakhamizi zesiqintini seHwange, esigabeni seMatebeleland North, zikhala ngokusilela kwezambuzi kulumango ngesikhathi eleZimbabwe libhekane lobunzima bokusabalala komkhuhlane wesihudo eseCholera oqhubeka imemetheka elizweni lonke okwethusayo.
Phakathi kwezizatho ezibangela lokhu kusabalala kweCholera, yikuswelekala kwamanzi ahlanzekileyo kanye lezambuzi.
Kunje izakhamizi lezi zikhala omkhulu umkhosi zisithi sezihlalel’ ovalweni ngesizatho sokuba imizi eminengi ayilazambuzi. Baqondisa isikhalazo sabo sezambuzi kuhulumende, ngoba bisithi egangeni akusahambeki akusela zihlahla zokuchatsha ngemva kwazo njalo sebesesabela lezifuyo zabo ngoba imuli ezinengi kazilandlela zokulondoloza ukuhlanzeka nxa zingela zambuzi.
Ekhuluma embuthwanweni wezakhamizi zase Hwange, uMnumzana Victor Ndlovu ongusabhuku wakoMvuthu uthi ngokwesilinganiso ebhukwini lakhe, mihlanu imizi elezambuzi phakathi kwengamatshumi amathathu lanhlanu-35.
“Okwezambuzi kusiphatha buhlungu ngoba idoti ingcwele ngemva kwezindlu, impukane zibuya ledoti ekudleni lezibungu lazo, ngakho imikhuhlane kayiphumi emakhaya. Kunje kule cholera, izasibamba ngoba kasilazambuzi ezigabeni ze 33, 33, 37, 37 Kachechete.”
Ongukhansila weKachechete uMnumzana Givemeagain Moyo laye ufakaza ngaloluhlupho, esithi kunje ngokubhaha komkhuhlane wesihudo seCholera, inengi lisengozini, njalo lezakhamizi kanye lezifuyo kazinathi manzi ahlanzekileyo ngoba izifula ezinengi ezingcelezelane lemizi le zamukela izikhukhula zengcekeza le.
“Ezigabeni esikuzo kuyasilela izambuzi, okungabalomthelela omkhulu kakhulu lokumemetheka komkhuhlane ongaqhamuka ofana lesihudo, njalo abantu basengozini yokubhubha isizwe sitshabalale ngenxa yokusweleka kwezambuzi lezi kodwa loba lokhu kusemthethweni, abantu bayaswela, iminwe kayilingani bazithola bengelawo.”
UNkosikazi Elitha Dube laye oyakhele emangweni weMatetsi laye ukhala ngohlupho lunye, esithi lasegangeni akusahambeki ngokwenyanyeka.
“Indawo yonke uhamba ukhafula. Abantu bayahlupheka, njalo uyaswela lokuthi usole bani phakathi kwalokhu. Abanye bayagebha amagodi ngemva kwezindlu, kodwa lakho akuhlanzekanga ngoba inkukhu zibuya njalo ziphande, impukane kuyesabeka ngitsho leziluhlaza emakhaya. Isicelo sethu yikuba aluba uhulumende uyaletha inhlelo zabanjengathi besakhele ngoba nje ungaze uye Binga, Elupane, eTsholotsho, luhlupho lunye.”
Uhlupho lokusilela kwezambuzi lwelekelelwa luphenyo lwe Zimbabwe Vulnerability Assessment Committee 2022 Rural Livelihoods Assessment Report lona olwethula ukuba imizi engaba yisilinganiso sokungamatshumi amahlanu ekhulwini-50%, esabelweni seMatabeleland North kayila zambuzi.
Bathi lokhu kubangelwa yisimo sobumpofu bezakhamizi lezi ezibhekane labo. Bejiyisa lokhu, bathi izakhamizi ezifika phose amatshumi amane ekhulwini -36. 3 percent esabelweni lesi ziphila lemikhuhlane engelaphekiyo njalo imizi eminengi ikhokhelwa ngabangasela mandla okusebenzela imuli abayizalukazi, intandane kumbe omazakhela, okuyikho okwenza intuthuko efana lokwakhiwa kwezambuzi ihlehliselwe emuva.
Kodwa UMnumzana Itai Rusike okhokhela inhlanganiso ebona ngezempilakahle kazulu eye Community Working Group on Health uthi njengenhlangiso abakubona ngomnyaka ka 2008 kulesihudo seCholera kuleli esabulala inkulungwane ezedlula ezine -4 287 zabantu, uhulumende kumele athathe amanyathelo.
“Esikubonayo yikuba kuqhubeka nje imizi eminengi iswela izambuzi, kudala uhulumende wayebambisana lezinye inhlangothi ukusiza labo ukuba bakhe izambuzi njalo kwezinye izigaba osabhuku babekwenza kubemgumthetho ukuba ungakafaki isakhiwo uqale ngesambuzi kodwa silokukhathazeka ngoba liyaqhubeka lisanda inani labantu abasebenzisa iganga njalo lokhu sikubona kakhulu eMatabeleleland North kodwa lokhu kwandisa ukumemetheka kwemikhuhlane efana lezihudo.”
Ephendula kolokhu, umqondisi kahulumende kusabelo se Matabeleland North uMnumzana Richard Moyo uthi bazama ukwethula inhlelo ezifana leze Water. Sanitation and Hygiene ukwehlisa lokhu.
“Kulama programs ku rural district councils ukuthi kuyakhiwe emizini yonke izambuzi ukwenzela ukuba abantu bengayi egangeni ngoba izulu nxa lisina kuyageleza kungene ezifuleni amanzi akhona baphinde bewanathe.”
UMoyo uthi imali zama Devolution Funds avela esikhwameni sikahulumende, amakhansili lawo kufuze angeze kizo bakhele abaswelayo izambuzi njalo uthi lokhu kuyindingeko ephuthumayo ngesimo sobhubhane lwe Cholera.
Forum