Ikhomishini elawula amcala awenkohlakalo eye Zimbabwe Anti-Corruption Commission-ZACC isungule umhlangano wokuxoxisana ngendlela izwekazi le Africa elingasebenzelana ngayo ukumelana lolupho lwenkohlakalo lobusela bomnotho kazulu.
Lokhu kwenzakala ngesikhathi inhlanganiso ye Transparent International yethule impumela yophenyo olwenziwe nyakenye oveza ele Zimbabwe ukuba ngelinye lamazwe akhokhelayo kwezenkohlakalo.
Emazweni angaba phose angamakhulu amabili -180 akhokhelayo kwezenkohlakalo, eleZimbabwe litholakale likusibanga sokuphezu kwekhulu lengxenye-157.
Isikhulumeli sekhomishini le, eye ZACC, uNkosikazi Simiso Mlevu uthi lumhlangano ubuthanise ingcitshi ezigoqela ezemakolitshi aphezulu, abomthetho lenhlanganiso ezizimeleyo bebonisana ngendlela yokumelana lenkohlakalo.
“Injongo yikuthi ingcwethi lezi nxa zihlangene ziphane ulwazi ukuthi bungalwisa njani ubugwelegwele lobu osebande kangaka eAfrica lasemhlabeni wonke jikelele.
Ingcwethi ecubungula ngezamalungelo kazulu ekunhlanganiso ye Coalition for Market and Liberal Solutions, uMnumzana Rejoice Ngwenya uthi loba lumhlangano ulenjongo enhle, udubo yikuba kuphelela emlonyeni kungela ababotshwayo ngamacala enkohlakalo elizweni.
“Akulalunga le Zanu Pf elaze labotshwa libotshela inkohlakalo lokutshontsha umnotho kazulu nampo ke o Wadyajena, oScott Sakupwanya, oObadiah Moyo labo Rushwaya lokhe betshakala, IZACC liqembu eliqeda isikhathi lezimali zikazulu kalidizwe kufukwe abantu abangelabudlelwano le Zanu Pf lo Mnangagwa.”
UMnumzana Effie Moyo eyinye njalo ingcwethi ecubungula ezomnotho, ekunhlanganiso yamalungelo abathengi eye National Consumer Rights Association laye uthi ukuxoxisana ngenkohlakalo akusizi, okufunekayo yikuba iZACC ibonakale ukuthi ilamazinyo ayihonkothi kuphela.
“Sibonile i-Aljazeera ibukise abantu abaphezulu abeba igolide, akulalutho olwenzakalayo. Abantu abalandelelwayo ngabanu abancane kakhulu ngakhoke kuzafanela kutshintshe konke khonokho uma inkohlakalo izasuswa elizweni.”
Ingcwethi lezi zithi iZacc kumele iqinise umsebenzi wokuphenya, ukubopha, ukutshutshisa kanye lokujeziswa kwabatholakala belamacala enkohlakalo.
Kodwa ephendula kulumbono, uNkosikazi Mlevu uthi bona amandla okwenza lokhu kabalawo ngokugcweleyo ngesizatho sokuba lokhu kudluliselwa kuhlangothi lwabatshutshisi olwe National Prosecuting Authority.
“IZACC yaphiwa amandla okucubungula, amandla okuthatha abantu eyebanika abathonisisayo so iZACC ayisiyo ekhululayo, njalo kayila amandla okuthi ingenele endleleni abasebenza ngayo, sikholwa sikholwa ukuthi kuyabe kuyi due process emthethweni .”
Umsekeli weBindura University of Science Education uProfessor Eddie Mwenje ovule lumhlangano uthi inkohlakalo isiluhlupho olumemetheka okwethusayo kunhlangothi zempilo ezitshiyeneyo okudala ukuba isilinganiso esikhulu sabantu sihlale kusimo esibi sobuyanga.
“Ngibona ukugxila kwenkulumo kufuze kweyame ukunothisweni kwelizwe lozulu njalo uzulu ngomzekeliso kufuze aphiwe umsebenzi awufaneleyo ngemfundo yakhe hayi ngokwazana kwabantu, lapho singathi inkohlakalo iyabe isinqotshiwe.”
Inengi labakade bekulumhlangano bakhuthaze ukusetshenziswa kobulembu phansi kohlelo olwe-Electronic Procument System abathi kungasiza ukuphephetha labo abaphatheka kunkohlakalo. Baphinde banika njalo ingqobe iZACC ukuba ingene ezigabeni ifundisa ngenkohlakalo le.
Bephendula kolokhu, bathi sebetholakala enkundleni zobulembu, njalo sebevule amawofisi endawani ezehlukeneyo zelize, lapho uzulu angayamangala khona.
Bathi njalo baphezu kokuxoxisana ngomthetho ongapasiswa ngabedale lephalamende wokuvikela labo abangabanyenyezela ngodletshana lwenkohlakalo engabe isenzeka ephambanisa ukuqhutshwa kuhle kwentuthuko yelizwe.
Umhlangano lo ogqitshwa kusasa wenziwa phansi wendikimba ethi, ‘Combating corruption for sustainable economic growth: Promoting good governance, accountability and ethical culture in the public and private spheres’
Forum