Uthola Umvuzo weZTA Award, uNodumo Moyo ngohlelo Lwakhe Lokukhanga Izethekeli

UNkozikazi Moyo waseGande, uthi loba edabuka inengi elithi kusemaguswini akomnyam’bambile, ungene kulumncintiswano ngesizatho sokutshengisa ukugxila lokucija kwengqondo akukhethi imvelaphi yomuntu loba ukuba uthola inzuzo enganani, okuqakathekileyo liphupho elihle.

Umvuzo lo, uwuzuziswe yikwelula kwakhe umqondo ngokusungula indlela zobulenjini, iArtificial Intelligence-AI, ezingasetshenziswa ngayo ukuhuga izivakatshi ngokwazi ezombukiso otholakala kundawo ngendawo zesabelweni seMatabeleleland North kanye lentengo yazo.

“Ibizo le program yi tourmice yona ingeyokubukisa, lokuhlela sisebenzisa i-Artificial Intelligence, ukwenzela umuntu into eyiyo ayifunayo kulokuthi senze ukugijima lapha lalapha sibuza ngentengo, sekusenza lokhu kubelula, kuyanceda lokhu ukuthi izivakatshi zingadubeki ukwazi ngendawo yakhona.”

UNkosikazi Moyo uthi loba yena wafundela ukuphenya ngezomnotho ekolitshini eliphezulu, wafundiswa yi-internet lokhu, njalo uthanda ukukhuthaza ontanga bakhe ukuba bekhwabithe ukuhlomisa ingqondo zabo ngokufana lalokhu kanye leminye imisebenzi ukuzwe kwehliswe izinga lokuthathwa kwezidakamizwa phakathi kwabasakhulayo, osekutshayisa lenkokheli ikhanda ukuthi kungehliswa ndlelabani

“Kulokuthi ukhangele into ongakwazi ukuyixazulula ngokudakwa, kufuze ukhangele into ongayenza ukuthi ubengcono njalo uzamangama ungaselandaba lama drugs, ngibakhuthaza ukuba bahambe ebulenjeni beyedinga inhlupho ezingaxazululwa ku internet bebambane bekwenze, impilo iyabalula.”

Echasisa ngokusungulwa kwalumkhankaso, uMnumzana Daniel Mumpande okhokhela isabelo se Matabeleland North Province ekuhlangothi lwe ZTA, uthi uhlelo lolu baluqala ngomnyaka ka 2021 basebeluvuselela njalo ngoNkwenkwezi walonyaka, lapho abavulele ontanga abaleminyaka engamatshumi amathathu kusehla ukuba bebhalise kumcintiswano wendlela zokuthuthukisa ezombukiso.

“Esikuloyisayo yikuthi laba benze ama proposals ayenza ukuthi i-tourism ibelula, ngomzekeliso, sifuna umuntu ozasitshela uku ama travel agents anga-booker njani, kungatholakala njani ukubizwa kwentengo zama hotel, kumbe ama cheap-fryer okupheka ukuze kungasetshenzisa amafutha amanengi. Yizo ezinto esiyabe sizifuna.”

UNkosikazi Moyo uzaqhubekela phambili emavikini alandelayo ayencitisa labanye abadabuka kwezinye izabelo zelizwe.

Emkhosini wokunikezwa kwemivuzo lo, owe Zimbabwe Tourism Authority Award, abesifazane abaphatheka emsebenzini wezivakatshi bebekhala ngokwanda kwamankampani ahluma lapho lalapho ethengisa okufanana lalokho abakulungisa ngezandla, besithi loba nje imncintiswano enje isenziwa ukuthuthukisa abasakhulayo, okufuze kuhlolisiwe luhlangothi lolu yikwabiwa kwamaphepha okuthengisa ama-licences, besithi kunje kabasatholi yona elesikhala.

Unkosikazi Buyisile Sibanda okhokhela inhlanganiso yabomama eye Zambezi Arts and Craft Women’s Market unika umbona wakhe ngabafisa kwenzeke.

“Akusela business, kugcwele okokuthi okunye nza ukuthengisa nge $20, omunye uyathi akuhambe nge 5, ungabuza uyathi mina ngilambile. Sibona angani uhulumende nga uyehlisa ukuphiwa kwama licence, njalo lathi sivunyelwe ukuphuma lento zethu siyebukisa kwamanye amazwe, yikho esikubona kungasiza ngoba izinto lezi zihle ziqale ukuthengiselwa e airport lasemawoteleni.”

Ukuxazulula lokhu, kubelombono wokuthi uhlangothi lolu labenhlanganso zombukiso behlangane phose nyanga zonke ukuze belobele uhulumende bemchazele ngenhlupho zabo.

Kubuye njalo kwaba lokuxoxisana ngezinga lentengo zombukiso kudolobho leli, abathi liphezulu kakhulu, ngakho kufuze lehliswe ukuze inani lezivakatshi liqanse kulandela ukuphazamiswa kwalumsebenzi ngesikhathi sobhubhane lwe Covid-19.