Abedlula Inkulungwane Ezinhlanu Bahlaselwa Yisihudo seCholera

Ingcwethi zezempilakahle ezeZimbabwe zikhuthaza uzulu ukuba aqhubeke elondoloza ukuhlanzeka zikhathi zonke ukuze azivikele ekubambeni umkhuhlane owesihudo eseCholera, osuhlasela inengi ezweni lonke njalo uvame ukumemetheka lula ngesikhathi sezulu.

Umqondisi wezempilakaHle koBulawayo phansi kogatsha lukahulumende lwezempilakahle uDokotela Maphios Siamuchembu uchasisa isimo ngalumkhuhlane owesihudo seCholera kuleli dolobho.

"KoBulawayo lisiyatshona ilanga izolo besilezigulane ezilomkhuhlane weCholera ezilitshumi lambili. Abane batholwe belawo, abathathu njalo bebelesiqiniseko sokuthi balayo kwabhubha oyedwa. Oyedwa lo sicabangela ukuthi ubulewe yiCholera siphakathi kokuhlola ukuthi ubulewe yiyo sibisibili,"

UDokotela Siyamuchembu uthi lumkhuhlane uludubo hatshi koBulawayo kuphela, kodwa usabalale elizweni lonke

"Umkhuhlane weCholera uqale eMashonaland West, eMasvingo leManicaland usuhlasele kakhulu njalo njengelizwe sisengozini ngoba abantu bayahambahamba njalo ulakho ukumemetheka lula. Okwamanje siqaphele abantu labo kumele baqaphele, abantu abahlanzeke bageze izandla sikhathi sonke behlukane lokuxhawulana benathe amanzi ahlanzekileyo. Libilise amanzi lingakawanathi iCholera iyabulala. Sinanzelele ukudla lamanzi konke akubengokuhlanzekileyo Bulawayo."

Inengi elihlaselwa yisihudo seCholera ligijinyiswa yisisu likhupha ingcekeza engamanzi lamehlo ayawela lnengi edolobheni lakoBulawayo lihlalele evalweni kulandela ukuhamba kwamanzi lokudubuka kwempompi ezithwala amanzi engcekeza ephuma ezambuzini.

UNkosazana Nokuthaba Nyathi uthi ngabe ikhansili iyehlisa amalanga okubavalela amanzi lokulungisa masinya impompi zengcekeza ezidubukayo.

"Izikolo seziqalisile ukulimukisa abafundi ngokuhlanzeka ukuze bevikele umkhuhlane weCholera osukhona edolobheni."

UBulawayo usekhuthazwe ukuba engazibona elezibonele zesihudo agijimele ekilinika ayethola usizo lokwelatshwa. Umkhuhlane wesihudo uvele uludubo hatshi koBulawayo kuphela kodwa lakwamaye amadolobho elizweni jikelele lasemaphandleni.

Isihudo eseCholera sabulala abantu abedlula abangamakhulu amane ngomnyaka ka 2008 kusiya ku2009. Kuthi ababanjwa yilumkhuhlane babesedlula inkulungwane ezilikhulu-100,000. Ngomnyaka ka2018 kusiya ku2019 iCholera yabulala abantu abafika kumatshumi phose ayisikhombisa.

USikhwicamfundo Mthuli Ncube umphathintambo wezemali, uchaze ukuba uzasebenza lekhansili yakoBulawayo ukutholisa uzulu amanzi ahlanzekileyo.

"Uhulumende uzasebenza lozulu ekutholiseni izakhamizi amanzi ahlanzekileyo silemigodi yamanzi esayigebhayo eNyamandlovu Acquifer ukuze uzulu athole amanzi ahlanzekileyo."

Okwamanje uBulawayo uthola amanzi kabili kumbe kathathu ngeviki ngesinye isikhathi amanzi abuya eludaka kumbe elephunga libi. Inengi ligijinyiswa yizisu.

Abagulakakhulu sebethe bayalaliswa esibhedlela seThorngrove Hospital lapho abathola usizo lokwelatshwa. Izikolo lazo zibikwa zibheke ngelihlo lokhozi isimo sokuvikela ukusabalala kwesihudo secholera ezikolo ngoba sebekhona abahlaselwe yiCholera.