Ele Russia selisungule uhlelo lokufundisa uzulu wase Zimbabwe ulimi lwalelo lizwe, olwesiRussian, njengendlela yokuqinisa ubudlelwano phakathi kwabantu abadabuka emazweni womabili.
Uhlangothi lwezifundo olweRussian Open Learning Center, lusungulwe okusemthethweni ekolitshini leUniversity of Zimbabwe, ngoMvulo odluleyo, mhlaka 16 Mfumfu njalo kuzaqala linyanga.
Umqondisi obona ngezifundo zekholitshini leli, uMnu. Munyaradzi Madambi, uthi ukufundwa kweRussian ekolitshini leli, kuhambelana lesifiso sikahulumende, sokuhuga abamabhizimusi bakwamanye amazwe ukuthi babuye ukuzotshala imali eZimbabwe.
“Indimi ziqakathekile ngoba zenelisisa ukuthi osomabhizimusi bakhulumisane kungela nkinga. Yikho nxa sisithi ilizwe lethu livulekile ukuthi loba bani waselizweni liphi engabuya ukuzosungula ibhizimusi lakhe kwelakithi, kuqakathekile ukuthi sibe lolwazi lwendimi ezifana leChinese, French, Portuguese, Russian, German, lezinye. Ubudlelwane osobukhona kulezinsuku phakathi kwamazwe omhlaba, bukhombisa ekuthini sifundele indimi ezitshiyeneyo.”
UMnu. Madambi wengeze esithi isiRussian sizafundwa kulandelwa iziqondiso zeUZ, egoqela ukubhadalwa kwezimali zezifundo ngabafundi bonke.
Obona ngezokwethulwa kwemibiko esigodlweni sommeli weRussia eZimbabwe, uMnu. Egor Kuropiatnik, uthi ukufundiswa kweRussian elizweni, kuveza ukuqina kobudlelwane bamazwe womabili.
“Liyakwazi ukuthi sesiliminyaka eminengi sitholisa izifundi zaseZimbabwe indawo zokuyafunda ezikolweni zaphezulu kweleRussia. Khathesi bazahamba sebesenelisa ukukhuluma ulimi lwethu. Ziyathaba kakhulu izifundi zethu, ngalokhu esikwenzileyo. Kuthi njalo, osomabhizimusi bazancedakala ngoba leli thuba lokufundela iRussian ayisikho lezifundi kuphela, kodwa loba bani ongafuna, sibalisa abakumabhizimusi. Konke lokhu kutshengisa ubungane obumqotho phakathi kweRussia leZimbabwe.”
Kodwa ingcwethi ecubungula ezombusazwe, esebenza lenhlanganiso yeZimbabwe Democracy Institute, uMnu. Bekezela Gumbo, uthi ukuvulwa kwohlangothi lwezifundo zeRussian eUinversity of Zimbabwe, kuveza eyinye yendlela zeRussia zokufuna ukuhuquluza umnotho weZimbabwe.
“Kufanele sinanzelele ukuthi iRussia isikhathi sonke lesi ibibukele abanye besidla, kodwa sikhangele ubukhokheli bukaMongameli Putin, isizinikele layo ukuthi kufane idle, ngengamanye amazwe amakhulu. IBriatain yadla, yadlula, iChina isidlile okuzwayo, khathesi iRussia isibuya ukuzokudla okutshiywa ngamaChina. Ukuthi idle kuhle, kufanele abantu bezwe ulimi lwayo, yikho asebekwenza.”
Kodwa uMnu. Rejoice Ngwenya, ingcwethi ecubungula ezobudlelwane bamazwe omhlaba, njalo engumqondisi wenhlanganiso yeCoalition for Common Markets and Liberal Solutions, kavumelani loGumbo.
“Liqisino ukuthi kulebhizimusi elikhulayo phakathi kweleZimbabwe leleRussia, yikho kusobala ukuthi indimi zethu zikhulunywe. Labo abeRussia kumele beye ezikolo zethu beyefundela indimi zethu, ukuze besebenze lezisebenzi zethu kuhle. Nxa lathi sisiyathengisa izinto kumbe sisiyadinga ibhizimusi khonale, kumele sikhulume phela isiRussia singagagasi. Ukungena kwemabhizimusi eRussia lapha, kufanele kufanane lokungena kwamabhizimusi ethu eRussia, okufanana lakundimi.”
Enye ingcwethi ecubungula ezombusazwe, umnumzana Masimba Kuchera uthi akaboni ele Zimbabwe, lithola inzuzo ekhanyayo kulokhu kusebenzelana kwamazwe womabili.
“Ngibona njengani iRussia yiyo ezathola okunengi lapha ngoba ungakhangelisisa lapha, abakuleli yibo abazafunda ulimi lweRussia. Loba bengafunda iRussian, kuvele kunzima ukuya elizweni leli, kungaba yikuyasebenza kumbe ukuyakwejisa, ngoba kulobandlululo olukhulu lwabantu abamnyama. Sibona khathesi, ilizwe leRussia lilamabhizimusi amakhulu elizweni lethu, njalo yibo abazazuza okuthile ekufundweni kwedimi yabo.”
Lolu hlelo lwezifundo zeRussian, lusungulwe eUZ ngokusebenzelana lekolitshi ele Russian Biotechnological University, imele ugasha lwezemfundo kweleRussia.
Ele Russia libikwa liqinisa inhlelo zalo zokutshala imali emisebenzini ehlukeneyo eZimbabwe, egoqela eyezokwemba leminye.
EleChina, yilo lamanye amazwe awaqala ukusungula uhlangothi lokufundwa kolimi lwaleli lizwe eUniversity of Zimbabwe ngomyaka ka2006, okwasolwa ngabanengi ngoba ilizwe leli lalisetheswa amacala okuhuquluza.
Ezinye ingcwethi zokudlelana kwamazwe womhlaba zithi, inyathelo elathathwa yiChina, hatshi e Zimbabwe kuphela kodwa lakwamanye amazwe awezwekazi le Africa, yilo eselilandelwa ngeleRussia.
Forum