Abebhanga leStanBic, babe lombukiso abawenza minyaka yonke labe China wezamabhizimusi oweStanbic-China Day oqale ngoLwesihlanu uphela ngoMgqibelo.
Lumbukiso wenziwa ngenjongo yokuqinisa ubudlelwano phakathi kabosomabhizimusi base Zimbabwe labeChina.
Elandisa phezu kokuqakatheka kwalolusuku, umqondisi oweStanBic eZimbabwe, umnumzana Solomon Nyanhongo uthi bazokwenza konke okusemandleni abo ukuqinisa ukusebenzelana kwabosomabhizimusi bamazwe womabili ukuze kungabi lokuqilana kwamacele la.
“Inengi lamankampani lithenga impahla kweleChina, ngokusebenzisana ke, silabo esisebenzisana labo kweleChina, abayibo abakhangela isimo sempahla evela kweleChina ukubona ukuthi bathola impahla elungileyo.”
Kulabamankampani amanengi aphatheka kulumbukiso agoqela akumsebenzi wamaInsurance.
Unkosazana Samantha Sisasenkosi Ncube ongumcebisi kwezokuthatha ama-insurance ulandisa kabanzi ukuba busiza ngayiphi indlela ubudlelwano labakwamanye amazwe afana leChina.
“Silethemba lokuthi ngokuba lapha sizabonakala sikwanise ukubikisa ama-products esilawo, sihlangana lamanye ama-business sibanceda ngendingeko zabo zonke ze-insuarence. Ngicabanga ukuthi ukuthi sibuye lapha kuzasinceda ukuthi sikwanise ukukhankasela ama-products eMINERVA.”
Umqondisi obona ngenhlelo ezethulwa yinkampani yezindaba eyeDIPLOMAT, uNkosazana Nomathemba Hlekisa Dube uthi leli lithuba elihle lokuqinisa ubudlelwane phakathi kwabosomabhizimusi bamazwe womabili.
“Ukubaya kwethu esikwenzileyo lapha sibuye ukuthi sihlangane lama-different businesses abuyileyo lapha ukuthi abe kwazi ukuthi thina sikhona. Kulama-Embassies ayabe efuna ukusebenza labo, bayakwanisa ukwenza lokho ngokubuya kithi sibancedise.”
Okhokhela inhlanganiso yabosomabhizimusi eyeConfederations of Zimbabwe Industries-CZI, uNkosikazi Sekai Kuvarika, ulandisa ngezifiso zenhlanganiso yakhe ekudlalaneni kwabo labosowabo abeChina.
“Lokhu kunikeza lithuba lokusungula amabhizinisi njalokunikeza ithuba ithuba kwezokusebenzisana kwezamabhizinisi.”
Esinye isiphathamandla sebhanga le-Industrial and Commercial Bank of China-ICBC, umnumzana Haonan LIU, uthi ukwanda kwamankampani elizwe lakhe eZimbabwe kuyisibonelo sokuqina kobudlelwano phakathi kwamazwe womabili.
“Sifisa njalo ukubona amankampani amanengi ethengiselana lawekweleChina kwelakusasa.”
Kodwa enye ingcwethi kwezomnotho, owake wasebenza ebhanga elikhulu lelizwe ele Reserve Bank of Zimbabwe - RBZ, umnumzana Masimba Manyanya uthi bazoyicela isivuthiwe ngoba engabathembi abeChina.
“Ngizakupha umzekeliso omncane, buya eProspect Mine okungenye yalezo ezileLithium enengi emhlabeni jikelele, uzathola ukuthi into ezincane kuleyo mine zikuthengwa kweleChina.”
Imizamo yeStudio 7 yokuzwa imibono kahulumende weZimbabwe ngobudlelwano lele China kwezamabhizimusi ibe liphutha njengoba umpathintambgo wobuldelwano lamanye amazwe lezamabhizimusi umnumzana Frederick Shava, ubengadobhi ucingo lukamakhalekhukhwini wakhe.
Ubudlelwano beZimbabwe leleChina buhlezi buqinile kusukisela ngempi yenkululeko. Lokhu kuvezwa luphenyo olwenziwe ngabenhlanganiso yomanyano wamazwe womhlaba, iUnited Nations COMTRADE, ethi ngomnyaka odluleyo umsebenzi wokuthengiselana phakathi kwamazwe womabili, iZimbabwe ithenge impahla ebiza amadola eMelika edlula i-billion-US$1,1 Billion kweleChina, yona yathenga impahla ebiza amadola edlula ingxenye yesigidi-US$583.6 Million.
Ele China livame ukuthenga igwayi, lamatshe aligugu enjiwayo awegolide chrome lokunye kwele Zimbabwe.
Usuku lwalonyaka olwe Stanbic-China Day, lunanzwa ngombukiso wensuku ezimbili, oqale namhlanje uphela kusasa, phansi kwendikimba ethi "Creating Sustainable Partnerships for Growth".
Forum