Ozibiza ngokuthi ngunobhala jikelele webandla le Citizens Coalition for Change uMnu Sengezo Tshabangu uthi uselungiselela ukuxotshisa ephalamende, e-senate lakumakhansili amalunga alelibandla athi kakhethwanga ngumphakathi, ezikhundleni zabo kufakwe labo abakhethwayo.
Isikhulumeli sikaMnu. Tshabangu, uMnu. Khaliphani Phugeni uthi kuzakuba lula ukukhipha labo abangena ngohlelo lweProportional Representation kumakhansili ledale lephalamende leleSenate, njalo labo abanqoba kukhetho bazakuya kuma by elections engamenyezelwa nxa inyathelo leli seliphumelele.
UMnu. Phugeni uthi uzaveza uluhlu lwamagama alabo okufanele babe sezikhundleni kunye lenani labo elizweni jikelele kusikhatshana esilandelayo, kuqalisa ngesigaba sakoBulawayo kusasa.
Asizweni echasisa kabanzi ngaloludaba kungxoxo ayiqhube loSithandekile Mhlanga weStudio 7.
UMnu. Felix Magalela Mafa webandla leCCC yena uthi uMnu Tshabangu wasebenzisa ikheli yehofisi yebandla engelamvumo, yikho kuphendulwe ngayo, njalo usebalekela amapholisa ngoba esemangalelwe, futhi akusiqiniso ukuthi kulabantu abafuna ukumbulala.
Uthi kuyayangisa ukuthi uMnu Phugeni atshiye ibandla lakhe esiyakhulumela uMnu Tshabangu, ngemva kokuphatheka ekuxotshiseni asebengamalunga eCCC yena ekuMDC-T ngesikhathi esedluleyo, okuveza sobala ukuthi bobabili loMnu Tshabangu basebenzisa ithuba lapho abanga "kapula" khona.
Abalandeli bebandla le CCC ko Bulawayo babikwa bengathakazeleli ukuxotshwa kwamalunga alelibandla edale lephalamende lakumakhansili.
Sixoxe lesikhulumeli salelibandla koBulawayo uMnu. Swithern Chiroodza.
Forum