Amakampani aweZimbabwe aphume ngobunengi ukuzodinga ibhizimusi embukisweni oweGlobal Expo, owenzelwa eGaborone kweleBotswana kuyonale iviki. Lokhu kuza ngesikhathi isimo somnotho siqhubeka sisiba nzima kumakampani amanengi kweleZimbabwe.
Amakampani angamatshumi amabili lane (24) angene umbukiso weGlobal Expo oqhutshelwa edolobheni leGaborone kusukela ziku 11 Mfumfu, usiyaphela ngoMgqibelo mhlaka 14 Mfumfu.
Amankampani la angaphansi kwenhlangothi ezitshiyeneyo ezigoqela ezilungisa imphahla efana lokudla kanye lezembatho.
Inhlanganiso ebona ngokuthuthukisa ezamabhizimusi kweleZimbabwe eye ZimTrade, yiyo encedise amakampani la ukuthi abukise eGlobal Expo.
Unkosikazi Nozipho Maphala oweZimTrade uthi inhloso yokubukisa eGlobal Expo yikuzama ukudingela amakampani aweZimbabwe imikambo etshiyeneyo phandle kwelizwe.
“Silamankampani atshiyeneyo. Ekuhambeni kwethu sibone ukuthi kulesidingo kakhulu semphahla evela eZimbabwe. Yikho silapha silethemba lokuthi sizathola imikambo emitsha.”
UMaphala uthi kulezivunyelwano phakathi kweZimbabwe leleBotswana eziyenza ukuthi kube lula ukuqhuba ibhizimusi phakathi kwamazwe womabili.
“Kulesivumelwano esibizwa ngokuthi yi Bilateral Trade Agreement phakathi kwamazwe womabili. IGlobal Expo yinkundla esikhulile ekhanga amazwe amanengi omhlaba ngakho kungavulela amathuba amankampani eZimbabwe.
Omunye okade ebukisa eGlobal Expo, uNkosikazi Violet Mhute olenkampani eyenza impahla ngezikhumba koBulawayo uthi balethemba lokuthi ukuba khona kwabo eBotswana kuzathuthukisa ibhizimusi yabo.
“Ngiyathaba ukuthi njengo muntu wesifazane ngayenelisa ukungena kubhizimusi yezikhumba ekade iyindawo elabesilisa kakhulu. Ngiyajabula ukuthi ngenelisa ukusungula inkampani le njalo silethemba lokuthi sizathola ibhizimusi kweleBotswana.”
OweZimbabwe ohlala eBotswana ongene umbukiso weGlobal Expo, umnunzana Cephas Tshuma uthi ujabulile ngakubonileyo ngamankampani awekhaya wona aphume ngobunengi. Kodwa uthi isimo somnotho silakho ukubuyisela emuva ezinye inhlelo uma amankampani ethe athola ibhizimusi kweleBotswana.
“Abantu abafuni ukuthi bangafaka iorder yemphahla, baphuze ukuyithola. Kodwa ukuthengisa ngaphandle kwelizwe kungabanceda kakhulu ekutholeni imali yakwamanye amazwe hatshi ukuthengisa ngohlobo lwemali etshiyeneyo ekhaya.”
Umbukiso we Global Expo wavulwa ngokusemthethweni ngumongameli Mokgweetsi Masisi wakweleBotswana ngoLwesithathu, lapho atshengisa ukuthokoza ngokubona amankampani aweZimbabwe ebukisa ngobunengi.
Amankampani amanengi abhekane lobunzima bokwenza ibhizimusi ekhaya lapho okungela kuhlaliseka emkambo wemali, okugoqela ukusetshenziswa kohlobo lwemali yama bond notes.
Umbukiso weGlobal Expo ubanjwe ngaphansi kwesihloko esithi ‘AFCFTA as a spring board for improved intra-Africa trade’, kukhangelelwe isivumelwano esingaphansi kwenhlanganiso ye African Union (AU) sokuthuthisa ibhizimusi kuzwekazi le Africa, ese African Continental Free Trade Area.
Forum