EleZimbabwe limanyane lamazwe omhlaba ekunanzeni usuku oluqakathekisa amalungelo amantombazana olwe-International Girl Child Day lona olunanzwa mhlaka 11 Mfumfu minyaka-yonke. Lolu suku luza ngesikhathi ilizwe libhekane lokuqonga kodubo lokukhulelwa kwamantombazane lokwendiswa kwawo esasemancinyane, ngenxa yezizatho ezehlukeneyo ezigoqela ubuyanga.
Indikimba yalonyaka yokunanzwa kwe International Girl Child Day igxile ekutheni kudingwe amanyathelo awokwehlisa inhlupho ezibhekane lamantombazana, ukulwela amalungelo abesifazane kanye lokuqinisa imikhankaso yokulinganiswa kwamathuba ngokobulili.
Ingcwethi ecubungula ezombusazwe, uNkosazana Patience Sibanda oyisiphathamandla senhlanganiso yeZimbabwe Democracy Institute-ZDI upha umbono wakhe ngokuqakatheka kwalolusuku.
“Wonke umuntu yiloba owesifazana kumbe owesilisa, kumele belondoloze njalo beqakathekise amalungelo omntwana oyinkazana. Sesikhangela ikakhulu emaSontweni lapho esibona khona ukuthi bayendisa abantwana bengakafiki izinga lokuthi eyenelise ukuzicabangela.”
UMnumzana Victor Dube oyisakhamuzi seHarare uthi kuqakathekile ukuba amalungelo amantombazana alondolozwe ngoba kuyibo ikusasa yelizwe.
“Nga kuyakhangelisiswa kuqiniswa imithetho emayelana labantwana abancane beyibambe kuhle imithetho leyi ngingathi kungaba ngcono. Kodwa esikubonayio kweleZimbabwe yikuthi imithetho kayiqinanga, ingaqinanga kanjalo sidinge njalo ukuthi yindaba ingaqinanga sibona kuyikuthi labo abadala abasezikhundleni bonalabo abalezikhundla yibo labo futhi abahlukuluza abantwana.”
UMnu. Dube ukhuthaza abazali, ikakhulu obaba ukuba bengabandlululi abantwana abangamankazana beqakathekisa abangabafana.
“Sibona imuli ezinengi zisithi abantwana abangamankazana kabayekele ukuya esikolo ngoba imali akula, sikhangele njalo labo abantwana abayabe besithi singathi nxa sebekhulile bayahanjiswa emendweni bengafuni. Bamphongunikwa nje kumabandla wona lawa, banika abantwana abancane ukuthi balotsholwe ngabantu abadala. Njalo nxa kusiya kwezemfundo abantwana laba benikwe ithuba labo elokuthi bathuthuke empilweni.”
Umphathintambo wogatsha lwabesifazana lentuthuko yamabhizimusi, uNkosikazi Monica Mutsvangwa uthi uhulumende wakhe ukhathazekile ngokwanda kwezehlakalo zamantombazana aqhubeka ehlukunyezwa.
“Isisekelo sombuso sihle kakhulu, kasikuvumeli ukwendiswa kwezingane kodwa sibona ukwanda kwalobu bubi kusiya phambili.”
Lolu lusuku olwabekwa eceleni ngabomanyano wamazwe omhlaba oweUnited Nations njalo olwalonyaka lunanzwa phansi kwendikimba ethi ‘Invest in girls rights: Our Leader, our wellbeing’.
Forum