Ugatsha lwezempilakahle eZimbabwe lubika ukuthi umkhuhlane wesihudo owe cholera, usubulele abantu abangamatshumi amathathu, kuthi abalikhulu sebetholakale belomkhuhlane lo. Lokhu sokwenze uhulumende athathe amanyathelo okwehlisa inani labantu abavunyelwa ukuba embuthanweni efana lezimfa lasezinkonzweni.
Kugwalo lwabo abalwethule ngesimo somkhuhlane wesihudo secholera e Zimbabwe, kunyanga ezisanda kwedlula abogatsha lolu bathi kuze kube izolo abantu abafika inkulungwane ezine lengxenye-4,645 bacatshangelwa ukuba babanjwa umkhuhlane we cholera kuthi abaphezu kwamakhulu ayisificamunwemunye-905 yibo abatholakala belomkhuhlane lo ezibhedlela.
Isikhulumeli sogatsha lwezempilakahle uMnu Donald Mujiri utshele iStudio 7 ukuba ugatsha lwakhe lulabodokotela ezigabeni zonke zelizwe abancedisa labo abahlaselwe yicholera.
"Sikhuthaza ukuba nxa umuntu egula kaye sibhedlela esiseduze laye. Njalo ukuba abantu kabageze izandla phambili kokusebenzisa izambuzi. Kababilise amanzi kungelani lokuba bawathola ngaphi "
Endaweni ezifana le Bikita umqondisi wezempilakhale, uDokotela Thalia Mungwati wazise ukuba ugatsha lwakhe luzahlolisisa izimfa zonke ezenzakalayo lalapho okubuthana khona abantu.
Uqhubeke esithi kabasoze bavumele ukuba abantu bapheke ukudla endaweni lapho ababuthana khona emizameni yokwehlisa ukusabalala kwalomkhuhlane.
UDokotela osebenzela esibhedlela se Sally Mugabe uMnu Johnson Dlamini uchasisa imbangela yokuqhamuka komkhuhlane lo.
"Besikhuthaza ikhansili ye Harrae ukuba isincedise ngokuvula amanzi. Ilethe amanzi ahlanzekileyo ngoba yiyo abangela lumkhuhlane "
Uthe kuqakathekile ukuba ugatsha lwezempilakahle lube khona endaweni zonke lapho abantu ababuthana khona ukuze lukhangelisise ukuba abantu bayalandela na imithetho.
Eyinye ingcitshi kwezempilakahla uMnu Rockson Dube uthi ilizwe kalithathanga amanyathelo aqinileyo okuvimba ukuhlaselwa njalo yiCholera, ngemva kwesomnyaka ka 2007/8 lapho okwafa khona abantu abafika inkulungwane ezine- 4287.
"Ngembali yase Zimbabwe, indlela abamba ngayo impilakahle kazulu kakwekwenzi kuhle. Lokhu ngikutsho ngendlela okwenzakala ngayo ngo 2008. Okufunakalayo yimikhankaso eqinileyo ukuthi uzulu azi ukuba usukhona lumkhuhlane "
Ukhuthaze uzulu ukuba azigcine ehlanzekile esithi ukuhlanzeka kungancedisa kakhulu ukugcina impilo zabo.
"Icholera ibangelwa kakhulu yikuminyana lapho okungatholakali khona amanzi. Lokhu kumele uzulu akunanzelele "
Udubo lokuswelakala kwamanzi ahlanzekileyo emadolobheni sokusenza lokungabuthwa kwezibi kubikwa kungokunye osokubangela ukuba kusabalale imikhuhlane efana leCholera.
Ayisilo ele Zimbabwe kuphela elithe lahlaselwa yiCholera, ngoba kunyanga ezedluleyo uhlasele amazwe asemhlubulweni wangezansi yezwekazi leAfrica, agoqela i-Malawi, South Africa, Mozambique lamanye. Abantu abedlula ikhulu babikwa bubulewe yiCholera eMalawi, kusikhatshana esifitshane sedluleyo.
Forum