Uhlangothi olubona ngokulondolozwa kwezemvelo olweEnvironmental Management Agency (EMA) esabelweni seMatabeleland North lubika ukuba luqhubekela phambili uhlupho lokutshiswa kwamagusu, ikakhulu emangweni weHwange.
Kusukela ngenyanga kaNtulikazi kusiya kwephelileyo, sekutshe indawo ezifika inkulungwane ezedlula ikhulu lamahectares -112 thousand hectares.
Abe EMA, bathi ludla ubhedu loluhlupho emaphandleni angcelezelane lezihonqo zezinyamazana ezigoqela iHwange National Park leForestry Commision kubangelwa yizakhamizi ezizingela okungekho emthwethweni, labanye njalo abagamula izihlahla ezifana lezephane ukwenza amalahle athengiselwa emadolobheni ngesimo sohlupho lwamandla kagetsi kanye lentengo yawo.
UNkosikazi Sithabile Dube, omele inhanganiso le kunhlelo zokulondolozwa kwezemvelo lempumela yazo, utshele lumsakazi ukuba imlilo le isibhahe njalo kakhulu esigabeni seLupane, eMguza kanye leBinga.
“Umganga osutshile ubalisa i112 291 hectares siqathanisa lomganga owawusutshile ngesikhathi esifanayo wawuyi 165 544. 5 hectares. Nxa sikhangela ngendawo ezitshayo, sithola ukuba i-district yeHwange iyathungamela kumnyaka yonke, sikhuluma kunje sekutshe 49 874 hectares siqathanisa lomganga owawutshe nyakenye i 44 158 hectares.”
UNkosikazi Dube uqhubeka echasisa imbangela yaloludubo.
“Imbangela ezivamileyo ngezokuvima okungekho emthethweni ngoba sinanzelela ukuba indawo lezi zikuma state lands awa national parks, yikho lapho izigangi ezingena ziqale umlil.Sbona njalo ukuthi kulendawo lapho okwenziwa amalahle ngokungekho emthethweni njalo ama- districts la yiwo alembangela lezi.”
UMnumzana Vusumusi Masilela ongusobhuku ngaphansi kweNduna uMvuthu, laye uthi sebethwele nzima ngabazingeli laba abalumathisa iganga ezihonqweni zendle.
“Umlilo lowana nxa umemetheka uxotsha inyamazana zasendle, ezinye zicina sezibaleke zangena kuzakhamizi ukuthi ziphile kantike sezidala uhlupho.”
UMnumzana Givemegain Moyo, ukhansila wemaphandleni eHwange emangweni weKachechethe, uthi ukutshiswa kwamagusu sekubulele izinyamazana lezinanakazana ezinengi zendle kulindawo, lokhu kungumkhuba ongahambisana lenhlelo zokulondoloza. Uthi kunje indawo ezinengi kaziselamadlelo, njalo lotshani kalusahlumi njengayizolo.
“Ezinye izinyoni ziyafa, izinyamazana eziphila emhlabathini ziyafa, lezihlala emlindini ziyafa njalo, ngibona kufanele ukuthi kuhlawuliswe laba kakhulu ukuze kwehliswe ukumemetheka lokhu.”
Ezinye njalo izizatho zemlilo le, uNkosikazi Dube, uthi zibangelwa yizakhamizi ezivame ukuphunyukwa ngamabibi la nxa zicenta emasimini, njalo abanye ngabatshiya izitompu zokubhenywayo, bese iganga lisale lilumatha.
Njenge EMA uthi bakhulumisana labe rural districts council, abalimini kanye lezinye igatsha zikahulumende ngendlela zokwehlisa imlilo le.
“Ukukhulumisana labo kuphezulu kakhulu sisithi kunhlelo zonke ezikhona asiqaleni ngokukhuluma ngemlilo ukwenzela ukuthi izilimo zabo kumbe izifuyo ziphephe.”
Ngalokhu, izakhamizi, zikhuthazwa ukuba ziqoqe izikhali zemlilo zihlale zihlomile, njalo inkokheli zezigaba zikhulume kabanzi ngemililo le, zicente imingcele, okuthiwa ngama fire guards.
Phezu kwalokhu, izakhamizi zikhuthazwa njalo ukubumba amaqembu ama fire management committees azabona ngokufundisana lokucebisana lezakhamizi okugoqela ulwazi ngendlela yokuziphatha nxa sekwenzeke ingozi yomlilo onje.
Forum