Inkokheli zamabandla ezokholo lwesikhristu zikhuthaza ukuthi umongameli Emmerson Mnangagwa lomnu. Nelson Chamisa owebandla le-CCC bakhulumisane kutholakale indlela ezaletha ingqubela phambili kwele zimbabwe kulandela ukhetho okuthiwa aluqhutshwanga ngemfanelo.
Lokhu kuza kulandela umbiko kaMongameli Cyril Ramaphosa wakwele South Africa eyokuthi iSouthern African Development Community izaqhuba umhlangano wokuhlolisisa impumela yokhetho kwele zimbabwe.
Ilizwe leZimbabwe lilokhu limi manzonzo kungacaci ukuthi kungaqhutshekelwa phambili njani kulandela ukhetho okuthiwa aluqhutshwanga kuhle. Omunye wabaqala inhlanganiso yeChristian Alliance, engumgcinisihlalo wayo, njalo engumgcinisihlalo weAssociation of Evangelicals In Africa, uMfundisi Ray Motsi, uthi kufanele kuqale kwaziwe iqiniso ngokwenzakala kukhetho olwedluleyo kungakenziwa okunye kweleZimbabwe.
“Ukuthi ilizwe liyephambili kungathi kulokudonselana ngoba kulezinto ezithile ezingani azicacanga. Ukuthi kambe lokhu esikuzwayo yikho okuphumileyo yini kukhetho olusanda kwenziwa eZimbabwe? Siyezwa ukuthi khona abanye bathi bawinile abanye besithi balobufakazi bokuthi abawinanga. Nxa kunjalo kutsho ukuthi akula qiniso eligcweleyo ngakho esikwenzayo. Yindaba abantu bengafuni ukuthi kuphume egcekeni abantu bekhulumisane kuphume konke egcekeni.
Ekhuluma leStudio7, isikhulumeli sebandla eliphikisayo eleCitizens Coalition for Change, uMnu Promise Mkhwananzi, uthe bayafuna ukuthi kuhlalwe phansi kukhulunyisanwe ngaloludaba.
"Amatalks arayithi, asizange sike siwayale thina, kumele enziwe sivumelane ukuthi uhlelo lolu olwenziwayo alusulo khetho kwakuyikuqilibezela nje lokho."
UMnu. Moses Langa, umgcinisihlalo wohlangothi lwabasakhulayo kubandla leZanu PF eMatabeleland South, yena uthi ukhetho solwedlula njalo kumele uzulu ahloniphe impumela yalo.
"Thina abasakhulayo sibona angani kuqakathekile ukuthi abantu bahloniphe the 2 million plus voters, abavotela uMongameli Mngangagwa. Akusatshintsheki lokhu sekumele sisebenzela ndawonye sakhe ilizwe leZimbabwe.'
Ibandla leZapu lalo lithi likhangelele ukuthi inhlanganiso yomanyano wamazwe angezansi yeAfrica, iSADC, ingenele. Isikhulumeli salelibandla, uMnu Msongelwa Ndlovu, uthi balemibiko abayithumela eSADC ngalolukhetho.
"Thina sabhalela iSADC sibazisa ukuthi ukhetho olwaqhutshwa ngenyanga edluleyo lukhetho olungavezanga izifiso lentando kazulu, ngakhoke sabacela ukuthi baphathise ekuthini ilizwe libuyele njalo liyekhetha kutsha ubukhokheli balo."
Unobhala jikelele wenhlanganiso ye-Freedom Alliance, uMnu Nhlanhla Moses Ncube, uthi ukukhulumisana yiyo yodwa into engaphendla indlela enhle eyeZimbabwe.
Umongameli wakwele South Africa, uMnu Cyril Ramaphosa, ekhuluma lentathelizindaba zeSouth African Broadcasting Corporation ngeviki edluleyo, wazisa ukuthi kuzaqhutshwa umhlangano weSADC ozahlaziya udaba lweZimbabwe.
Forum