Abakubandla leCitizens Coaltion for Change elikhokhelwa nguMnu. Nelson Chamisa bathi amalunga abendla leli abotshwa mahlayana eZimbabwe kulandela ukhetho oluqhutshwe ngoNcwabakazi lonyaka.
Kusanda kubotshwa uMeya weBindura, uMnu. Jacob Gwature, okuthiwa watshontsha imali yabantu. Leli licala lakudala. Banengi abakusimo lesi ababotshwa ngamapholisa. UMnu. Ostallos Siziba, osanda kumiswa emthethwandaba lapho etheswe icala lokuthethisa owesifazana ngesikhathi kukhankaselwa ukhetho olunziwe ngoNcwabakazi, uthi athwele nzima amalunga eCCC.
USiziba, ongumsekeli wesikhulumeli sebandla leCCC njalo omele iTshabalala-Pelandaba edale lephalamende, uthi kuyamangalisa okwenziwa ngamapholisa okukhanya ebambisana lebandla leZanu PF.
Uphinde wathi kawaqedakali amacala ababhekane lawo.
Asenelisanga ukuxoxa ngodaba lolu lesikhulumeli samapholisa, uAssistant Commissioner Paul Nyathi, obangaphenduli umakhalekhukhwini. Ibandla leZanu PF lithi kalilani lokubotshwa kwamalunga ebandla leCCC. UMnu. Malaki Nkomo, okubandla elibusayo, uthi amapholisa kumele akhululeke ekuqhubeni umsebenzi.
Kodwa uMnu. Nhlanhla Moses Ncube, unobhala jikelele wenhlanganiso yeFreedom Alliance, uthi okwenzakala kwele Zimbabwe okwamanje kuthakazelelwa libandal elibusayo.
Kulabanye abakubandla elibusayo abathi akumelanga kukhahlanyezwe amalunga amabandla aphikisayo ngoba iCC kayimanga kahle okwamanje. UMnu. Joseph Tshuma, okudala leZanu PF Central Committee, ngomunye olumbono lo.
Banengi abantu abathi kumele inkokheli yebandla elibusayo lele CCC ikhumisane umlotha ukuze kulungiswe okunengi okubhekane lozulu. ICC ithi uMongameli Emmerson Mnangagwa weba ukhetho olwaqhutshwa ngoNcwabakazi.
Forum