Bayakwesaba ukutshisa kwelanga laseHwange abaqeqetshi beqembu leHighlanders, lapho abaya khona ngeSonto, besiyadlala leqembu leHwange emdlalweni owe Castle Lager Premier Soccer League
Umqeqetshi weqembu leHighlanders uBaltemar Brito utshele intathelizindaba zemidlalo ukuba uyakwazi ukuba eHwange kudlaleka nzima ngoba ilanga lakhona liyabe likhupha inhlanzi emanzini.
“Siyakwazi ukuba kuyatshisa njalo yisimo somkhathi esingaphezu kwamandla ethu kodwa thina esingakwenza yikupha abadlali bethu amanzi ayeneleyo. Kwesinye isikhathi okuqakathekileyo yindlela umuntu acabanga ngayo ngoba phela abantu bayahamba besiyawothamela ilanga litshisa bhe ngasekhunjini. Yikho lathi kumele sikuthathe njengokuthi siyazikholisela sidlala ibhola endaweni elelanga elitshisa bhe,” kutsho uBrito.
Iqembu leHighlanders lonyaka ngelinye lamaqembu akhangelelwe ukuba angaphakamisa isicoco seligi ngemva kokuba like lakhokhela phezu kwengalane yemiklomelo okwesikhathi eside.
Lize lehla layahlala endaweni yesibili ngemva kokuba linqotshwe emidlalweni emithathu ilandelana kodwa ngeviki eyedluleyo lenelise ukunqoba eleYadah.
Eminye imidlalo yesigaba seCastle Lager Premier Soccer League eyeviki lamatshumi amabili lane edlalwe ngoMgqibelo iphele kanje; Green Fuel 0 - 3 Simba Bhora ngase Green Fuel Stadium, FC Platinum 2 – 0 Herentals ngaseMandava, Chicken Inn 1 - 1 Triangle ngaseLuveve, Yadah 1 – 2 Bulawayo Chiefs ngaseBaobab, ZPC Kariba 0 – 3 Ngezi Platinum Stars ngaseNyamhunga, kuthi iqembu leSheasham linqobe ele Cranborne Bullets 1 ka nya ngaseBata.
Kweminye imidlalo ezadlalwa ngeSonto iqembu leDynamos lizangqikilana leleCaps United enkundleni yeNational Sports Stadium kuthi eleBlack Rhinos lizadlala leleManica Diamonds ngaseBata.
Kusenjalo inhlanganiso yeZimbabwe Football Association isiyethule uluhlu lwabadlali abazabumba iqembu labesilisa elimela ilizwe elizakuyadlala leleBotswana ngosuku lokunanza usuku lelolizwe elathola ngalo uzibuse mhla zingamatshumi amathathu kunyanga kaMpandula.
Iqembu leli elibunjwa ngabadlali abangamatshumi amabili lambili liqeqetshwa ngumqeqetshi weqembu leHighlanders uBaltemar Brito kuthi abasekeli bakhe nguBongani Mafu kanye loGenesis Mangombe.
Kusenjalo, inkampani yeTelOne isinikeze inhlanganiso eyeZimbabwe Cricket isipho sama bhimu alikhulu.
Ekhuluma emkhosini wokuqhubela abeZimbabwe Cricket amabhimu lawo isiphathamandla senkampani yeTelOne uJoseph Machiva uthe lesisenzo siyingxenye yemizamo eyogcina ilizwe lihlanzekile.
“Namhla kusipha injabulo enkulu ukuthi silazise ukuba ngemva kokupha amabhimu amadolobho amakhulu akuleli loluhlelo siyaluqhelisa ngokupha abeZimbabwe Cricket amabhimu alikhulu. Amabhimu lawa bazawasebenzisa enkundleni zabo ezilitshumi ezitholakala emadolobheni atshiyeneyo kweleZimbabwe,” kutsho uMachiva.
UMachiva uqhubekele phambili wathi phezu kwamabhimu, abeZimbabwe Cricket bazaphiwa njalo lezihlahla ezibalisa ezokucecisa kanye lezizala izithelo ezehlukeneyo.
Umqondisi wenhlanganiso yeZimbabwe Cricket uHamilton Masakadza uthe isipho samabhimu lesi sizabaphathisa kakhulu ekugcineni inkundla zabo zihlanzekile njengoba kusiba lengcekeza enengi nxa kulemidlalo ikakhulu eyeqembu lesizwe.
Forum