Abaphatheka kwezombusazwe eZimbabwe bamukele ngendlela ezitshiyeneyo ukunxuswa kuka Mnangagwa emhlanganweni weUnited Nations General Assembly oqale namuhla. Ibandla eliphikisayo eleCitizens Coalition for Change lona lithi kuyadanisa ukuthi uMnangagwa, ozakhuluma kulumhlangano ngolwesine, ungena lumhlangano ngesikhathi ehlukuluza abantu bebandla leli.
"Kuyadanisa ukuthi umuntu owaqilibezela kukhetho uyaphiwa ithuba lokukhuluma emhlanganweni oqoqwa yinhlanganiso emela amalungelo oluntu."
Ekhuluma leStudio7, umkhokheli weForever Associates Zimbabwe, uMnu Kudakwashe Munsaka, uthi abebandla eliphikisayo akulanto abayemukelayo laloba inhle njani. Uthi inhlanganiso yeUnited Nations kayilani lokhetho lweZimbabwe lolwamanye amazwe.
"Abaphikisayo uthi singabalandela yini, akulanto abangayiphikisiyo kungelani lokuthi inhle njani."
Unobhala jikelele webandla leFreedom Alliance, uMnu. Nhlanhla Moses Ncube, yena uthi akutsho ukuthi umhlaba wonke wamukele ngenjabulo ukuvotelwa kuka Mnangagwa.
UMnu. Antonio Guteres, unobhala jikelele wenhlanganiso yeUnited Nations wenzela uMnangagwa amhlophe ngokwenqoba kukhetho olwenziwa mhlaka 23 Ncwabakazi lonyaka. Njengenhlalayenza, kukhangelelwe ukuthi umongameli weBrazil uzakhuluma kulumhlangano kusasa, elandelwa ngumongameli weMelika uMnu Joe Biden. Umongameli weSouth Africa, uMnumzana Cyril Ramaphosa laye ukhangelelwe ukuthi uzakhuluma kulumhlangano kusasa. Umhlangano lo uzahlolisisa ngendaba ezitshiyeneyo ezigoqela ukuguquka komumo womkhathi.
Forum