UMongameli Emmerson Mnangagwa ukhangelelwe ukuba uzakuya kwele eNew York kwele Melika kunsukwana ezilandelayo emhlanganweni we-United Nations General Assembly.
Iziphathamandla zikahulumende zalile ukukhuluma ngeneni labantu abahamba lalo zisithi lokhu ukutsho lutho ngoba kumele ahambe labazamvikela, abaphathintambo benhlangothi ezitshiyeneyo labanye.
UMnangagwa ujayele ukuhamba labantu abanengi emihlanganweni yeUnited Nations General Assembly engenwa yinkokheli yamazwe atshiyeneyo.
Ukuze sihlaziye udaba lolu, sixoxe loMnu. Rejoice Ngwenya, ingcwethi kwezombusazwe okunhlanganiso ye-Common Market for Liberal Solutions othi uMnangagwa usindwa ngokwethulwe zinhlanganiso ezinengi ezithi ukhetho olusanda kuqhutshwa kwele Zimbabwe kaluqhutshwanga kahle.
Kusenjalo, abakubandla leCitizens Coalition for Change, abaphikisa impumela yokhetho oluqhutshwe kwele Zimbabwe ngoNcwabakazi, bathi bakhahlanyewa libandla elibusayo lamapholisa. UMnu. Felix Magalela Mafa, umsekeli wesikhulumeli sebandla leCCC, uthi bathwele nzima.
Kodwa uMnu. Malaki Nkomo, okubandla leZanu PF, uyakuphika lokhu esithi ukhetho solwedlule ngakho-ke abantu kababhekane lokubahluphayo hatshi ezokhetho.
Ibandla eliphikisayo eleCCC lithi kumele kuqhutshwe olunye ukheetho kwele Zimbabwe ngoba olwaqhutshwa ngoNcwabakazi lwalungakhululekanga.
Forum