Ukhansila kaWard 2 eGwanda, olilunga leZanu PF njalo oke wetheswa amacala enkohlakalo yizakhamizi phezu kodaba lokuthengiswa kwezitanda uMnu Thulani Moyo, sekhethwe ukuba nguMeya walelidolobho ngemva kokunqoba uMnu Edgar Ncube owebandla leCCC kukhetho oluqhutshelwe emahofisini kamanisipala namuhla.
Esamukela isikhundla lesi njalo ethatha isifungo sakhe sokuqalisa umsebenzi, uMeya omutsha uthembise ukusebenzelana ndawonye lamanye amakhansila ukuze bathuthukise idolobho leGwanda.
UMoyo uvotelwe ngamakhansila ebandla lakhe leZanu PF ayisikhombisa, 7, kwathi obencintisana laye oweCCC uMnu Edgar Ncube laye wavotelwa ngamakhansila ebandla lakhe ayisithupha, 6.
Ukukhethwa kukaMoyo kusolwe ngabanye abahlali abathi kathembekanga ngoba uke wathi esaphethe isikhundla sokuba ngumgcinisihlalo wokomidi kamasipala ebona ngokwakhiwa kwezindlu, inhlanganiso yezakhamizi yamethesa umlandu wokuphatheka kumisebenzi yenkohlakalo ekuthengisweni kwezitanda zikamasipala, okulicala alilandulayo.
Esikhundleni somsekeli kaMeya kungene ilunga leZanu PF njalo, uNkosikazi Sithabiso Mpofu, yena onqobe uMnu Wellington Nare owebandla leCCC ngamavoti afanayo.
Lokhu kutsho ukuthi idolobho leGwanda selikhokhelwa libandla leZanu PF lisuka ezandleni zebandla eliphikisayo. Lanxa kunjalo, uMeya omutsha uthi bazasebenza ndawonye lamakhansila eCCC.
"Engikuthembisa abantu beGwanda yikubana iGwanda ngilamatargets engikhangelele ukwenza ukuze umuzi weGwanda utshintshe ubengcono, akusoze kwaba lokukhethana ngezombangazwe ,ngithanda ukucela njalo ukuthi Amajahunda amahle besibambanise hatshi ukusehlukanisi , okwamabandla ezombusazwe sikutshiye eceleni."
Onqotshwe nguMoyo uMnu Edgar Ncube utshele iStudio 7 ukuthi kasoli lutho ngendlela okuqhutshwe ngayo ukhetho.
"UKhetho luqhubeke kahle kakhulu akulalutho olusolisayo , sikhangelele ukuthi iservice delivery ibengcono , sikhangelele nje indubo zonke esizayo ezeGwanda ezamanzi, ezokuthwala kwezibi zonke lezi izinto sizabambisana njengamakhansila sizame ukukulungisisa konke kube kahle."
Abahlali beGwanda labo bathi usodolobho omutsha kumele agcwalise isithembiso sakhe sokusebenza kuhle lamakhansila ebandla eliphikisayo ukuze kuthuthukiswe idolobho. Omunye wabo nguNkosikazi Priscilla Nkala.
"Mhlonitshwa njengoMeya weGwanda kumele uthande bonke abahlali balelidolobho njalo kumele uphathe pkhansila bonke ngokufanayo,akumelanga uthathe uhlangothi kumakhansila,kuzisebenzi zikamanisipala kanye lakuzakhamizi zeGwanda, lalela izikhalazo zabo ubasize lapho oyenelisa khona,kumele usebenze labanye njalo libambane eqejini lenu."
Omunye njalo umhlali weGwanda uMnu Nkanyiso Ncube uthi akamthembi uMeya omutsha ngoba eke wetheswa amacala enkohlakalo.
"Mina inguquko loThulani angiyiboni ngoba icorruption yona yodwa emqameleyo aseyiyenzile inengi kakhulu ukuthi angitshintsha ukuba corrupt ngoba sengumeya njalo ubengumeya ngoba efuna ukuqhubeka ngobugwelegwele sengathi yinto evunyelwayo."
Kodwa abanye bathi bayamsekela uMoyo. Omunye wabo nguMnu Albert Moyo.
"Yindoda elesibindi , uyamela lokhu abona kuqondile, idevelopment yinto ekuye, ngumuntu wabantu esikufisayo yikuthi abekwazi ukuthi nxa sengusonhloko wedolobho akusela kuthi lo ngowalelibandla yena sengubaba wedolobho sengubaba wabantwana bonke, loba ngabe opposition ngabakhe loba ngabe Zanu PF ngabakhe."
Isikhulumeli sebandla leZanu PF esabelweni seZansi yemaNdebeleni uMnu Malachi Nkomo uthi njengebandla bayajabula ukuthi banqobile kulolukhetho.
"Abantu abasoze bayekela ukukhonona lapha lalaphana uma omunye ethe wakhethwa, okukhona yikuthi ubaba uMoyo uThulani umeya weGwanda ukhulela eGwanda njalo ubesekhansilini okwesikhathi eside izndingeko zabantu abanengi uyazazi ngaphandle kokuthi izitha yizo ezizakhuluma ezikufunayo thina njengeZanu PF siyajabula ukunqoba kukatHulani ukuthi abengumeya weGwanda."
Umanisipala weGwanda ulamakhansila alitshumi lantathu, 13, njalo amane awo ngawesifazane.
Forum