Izakhamizi zakoBulawayo namuhla bezithe gwaqa ngobunegi bazo eAmphitheater koBulawayo, enkonzweni yokuvalelisa umuyi uJoshua Malinga, ophiwe inhlonipho yeqawe lesizwe. UMalinga wake waba ngumeya wakoBulawayo.
Abakhulume kulumbuthano bachaze uMalinga, obekudale leZanu PF politburo njalo ephila lobugoga, njengomuntu osebenzele isizwe okungathandabuzwayo. Bathe lokhu yikho okwenze waphiwa isicoco seqhawe lesizwe.
Umphathintambo wedolobho lakoBulawayo, uNkosikazi Judith Ncube, utshele abasesililweni lesi ukuba wephuke inhliziyo ngokwehlele uMalinga.
"Sivela gcotshwa eHarare ngibelamissed calls amahlanu avela kuMalinga ngazama ukuthi ngiwaphendule kodwa ucingo belungasadojwa, ebusuku ngezwa sekulombiko othi kasekho njalo bathi ubefuna ukukhuluma lami kakhulu ngidabukile silahlekelwe njengesizwe."
Omele iHwange Central edale lephalamende, uMnu. Daniel Molokele, utshele iStudio 7 ukuthi uMalinga ulwele abaphila lobugoga labantu bonke kwele Zimbabwe ngendlela ehloniphekayo.
"Ngizophelekezela uBaba uMalinga uliqhawe lethu engumzekeliso wabantu abagogekileyo eZimbabwe lomhlaba jikelele ebafikela lalapho okunzima ebevula indlela emhlabeni ebeyisibonelo esihle.Liqhawe lethu siyamhlonipha siyayibabaza impilo yakhe elezibonelo ezinhle."
UNkosikazi Rose Mpofu, omele isabelo seMatabeleland South phansi kohlelo lweProportional Representation kudale lephalamende, uthi liqhawe lamaqhawe.
"Ubaba uMalinga ngiqale ukubamazi ngo2013 ngingakabi yisigoga. Ngisephalamende ngokuncediswa nguBaba, sibonga umongameli ngokupha uMalinga isicoco sokuba liqhawe ngabe siyalandela imisebenzi yakhe ubulima bethu ngabe asibuboni sikhala labobonke abantu. okwenzakeleyo.
Ilunga lePolitburo kubandla leZANU-PF, uMnu. Tshinga Dube, uthi umalinga ubeyindoda emadodeni.
"Abantu abaphila lobugoga abafunde kuye uBaba uMalinga ukuthi ukubagoga abutsho usuphelele. Utshiye isifundo esimangalisayo, wenze imisebenzi eminengi njalo ubekhuthele kwezombusazwe enceda kakhulu izigoga."
Isikhulumi semuli, uMnu. Sibongilizwe Ncube, uthi balahlekelwe kakhulu njengomndeni.
"Siyabonga lonke ukuzokhala lathi siyabonga ukuthi libelathi . Sibonga lomongameli omkhethe ukuthi abeliqhawe wazalelwa eFelabusi uMabunda Ndlovu loMaNcube. Umuntu yakhula enze akwenelisayo, uJoshua wafika koBulawayo wasebenza wabalomuzi labantwana."
UMalinga ubhubhe eseleminyaka yokuzalwa phose engamatshumi athobaminwemiili - 79. Utshiye umkakhe uNkosikazi Ronia Malinga, abantwana abalitshumi labazukulu. UMalinga ubengumcebisi kaMongameli Emmerson Mnangawa.
Ngomnyaka ka1992 nguye owakhokhekhela umsebenzi wokuba kuphunywe lomthetho wakuqala okhangela ngabakhubazekileyo. Ubemela abakhubazekileyo edale lephalamende eZimbabwe, ezwekazi leAfrica lasenhlanganisweni yomanyano wamazwe womhlaba, iUnited Nations. Ukhangelelwe ukubekwa kusasa eNational Heroes Acre.
Kusenjalo, idale lephalamende namuhla lenze umhlangano koBulawayo ngokuphathelane lokusebenza kwedale leli, bekhangela elikwenzileyo eminyakeni imihlanu edluleyo lokuthi eminyakeni emihlanu elandelayo bazaletha nguquko bani ekusebenzeni kwaleli dale.
Lumhlangano wezifundo ubu khokhelwa ngumlawuli wedale lephalamende, uMnu Jacob Mudenda. Yena uchasisa kabanzi ngenjongo yohlelo lwabo lolu.
"Silomhlangano lapha koBulawayo ojonge ukuhlaziya ukusebenza kwethu kweminyaka emihlanu edlule siphinde siphume lendlela ezizakhuphula izinga lethu sisebenza kuminyaka emihlanu elandelayo. Silandela uhlelo lokuthi ilizwe lakhiwa ngabanikazi.
Uqhubekele phambili ethi ekuphawuleni kwabo bazananzelela labantu abakhubazekileyo.
"Sikhangelele ukuphuma lamasu asancedisa ukusebenza kwedale lephalamende kuthi singalibali abantu abaphila lobugoga ekuhleleni lekusebenzeni kwethu asisoze sibalibale."
UMudenda uchaze ukuba lo ngumnyaka wakhe wokucina esebenza edale lephalamende.
"Ngisebenzela ukuba ledale elihlonitshwa ngumhlaba angilankulumo ende ngoba angila mbali yempumela womsebenzi weminyaka edlule abangiphanga. Kodwa longumnyaka wokucina wokusebenza edale lephalamende ngikholise akutsho ukuthi angikholisi kodwa sengizakuyaphumula."
Olwela amalungelo oluntu, uMnu Ben Moyo, uchasisa okungabe kuhloswe lidale lephalamende eliqhube umhlangano lo koBulawayo.
"Kunengi okumele idale lephalamende likulungisise njalo kuyajabulisa ukuzwa uMudenda ethi usezakuyaphumula simtshayela ihlombe."
Abangene umhlangano lo bagoqela amalunga edale lephalamende asanda kukhethwa nguzulu kukhetho oluqhutshwe ngoNcwabakazi.
Forum