Ubudlwangudlwangu buphazamise umdlalo obuphakathi kweqembu leDynamos leleHighlanders enkundleni yeBarbourfields ngeSonto emini.
Awusaphelanga umdlalo wenguqu obuphakathi kweqembu leDynamos leleHighlanders ngemva kokuba kusuke kwaba lokulwisana phakathi kwabalandeli lamapholisa.
Lokhu kwenzakale ngemva kokuba unompembe, uAllan Bhasvi, eyekele umdlalo waqhubekela phambili ngesikhathi kulabadlali beqembu leBosso akade bewele phansi bucwadlana legedi leDynamos njalo abalandeli beHighlanders bekhangelele ukuthi mhlawumbe bengathola umbekwa.
Isiphathamandla seqembu leHighlanders uRonald Moyo akadobhanga ucingo lwakhe ngesikhathi sidinga umbono wakhe phezu kwalokhu okwenzakale enkundleni yeBarbourfields.
Umsekeli weqembu leDynamos uKaren Mataga uthi basuke bephaphatheka namhla enkundleni.
“Umdlalo kumele siwubekele sikhululekile kodwa okwenzakale namhla eBF akulunganga ngoba siphume sesigijima sibaleka njalo abanye balimele kwathi abanye baqalekile ngenxa yentuthu ehitshayo,” kutsho uNkosazana Mataga
Umsekeli weqembu leHighlanders uMthokozisi Mkhwebu uthi umsindo ubuzadeda aluba kungangenelanga amapholisa.
“Mina umlandu ngiwupha unompembe ngoba wehluleke ukuphatha umdlalo ngemfanelo uze uphele. Kuthe sekunjalo abalandeli beqembu leHighlanders babonakale sebekhonona njalo labo benze iphutha ngokuphosela izigubhu lokunye enkundleni.
Kodwa ekujikeleni kwabo izigubhu bekungamelanga kungenele amapholisa kodwa bekumele kuthunyelwe izikwamula ezivele zisazi abantu ngoba kuvele kuyaziwa ukuthi kungabuya amapholisa lezinja umsindo uhle umemetheke ngoba abantu bayahle bethi sekuliwa njalo yikho lapho okuqalele khona impi,” kutsho uMkhwebu.
Intathelizindaba yezemidlalo uNash Mkokwayarira uthi kulihlazo okwenzakale emagumeni.
“Umsindo wakhona ungabe ubangelwe yikuba abalandeli beqembu leHighlanders bebengathokozi ngomsebenzi kanompembe okubangele ukuthi bacine sebejikijela izinto phezu kwalokho bacina sebengene enkundleni.
Kuthe labeDynamos labo sebengene enkundleni kucine sekutshaywana okungasiyonto enhle ngoba abanye abantu balimele kwaphinda kwabhidlizwa lempahla.
Mhlawumbe abantu kumele bafundiswe ukuba isinqumo sikanompembe kumele basiyamukele njalo lanxa bekhonona bengavumelane laso kulendlela okumele bezilandele,” kutsho uMkokwayarira.
Ocubungula ezemidlalo uWashington Sibanda laye uthi abalandeli bomdlalo wenguqu kumele bafunde ukwamukela okuyabe kwenzakale enkundleni.
“Abalandeli beqembu leHighlanders besebefuthelene ngoba phela iqembu labo belinqotshwe emidlalweni emibili eliyidlale phambilini kwalo owanamhla njalo lanamhla kaliqalisanga kuhle njengoba lihle lahlohlwa kabili.
Kwenzakele futhi ukuthi kube khona izehlakalo abangazange bazithande okuyikho okubangele ukuba baphosele izikhali enkundleni bacina labo sebengena. Yinto engalunganga leyi njalo abantu kumele bahloniphe lokhu okuyabe kulawulwe ngunompembe njalo akumelanga bethathe umthetho bawufake ezandleni zabo,” kutsho uSibanda.
Umdlalo umiswe sekusele imizuzu ukuba amaqembu ayehlaba ikhefu ngemva kokuba abalandeli beqembu leHighlanders abahlala befulathele ibhukutsho beqale ukuphosela okutshiyeneyo enkundleni.
Imizamo yamapholisa eyokuletha ububelo ayiphathisanga njalo abadlali bamaqembu womabili bacine besiyacatsha bahle bahamba kokuphela.
Umdlalo umiswe iqembu leDynamos lilkhokhela nge 2 ka nya njalo inhlanganiso yePremier Soccer League yiyo ezathatha isinqumo ngempumela yawo.
Kweminye imidlalo edlalwe namhla iqembu leSimba Bhora libe ngutshiki lobhanqa 0 ka 0 leleHwange kuthi eleYadah linqobe eleCranborne Bullets nee 1 ka nya.
Forum