Amakhansila eGwanda afungiswe ukuqala umsebenzi ngoLwesihlanu athembisa ukuthi azaxazulula inhlupho ezibhekane lozulu walelidolobho, ikakhulu olwamanzi.
Abane phakathi kwamakhansila alitshumi lantathu, 13, ngabesifazane abathi bazakhangela inhlupho ezibhekane labomama emadolobheni.
Amakhansila la, athi okumqoka yikulungisisa udubo lwamanzi kulelidolobho oseluleminyaka lwaqala.
UMnu Darlington Sibanda ongukhansila kaWard 9 eGwanda owebandla leCitizens Coalition Change ngomunye walabo abagcotshiweyo.
"Yebo sigcotshiwe kodwa lokhu sikhonona ngempumela yokhetho lokhu siyiphikisa, ngenxa yikuthi sikhethwe ngabantu abantu basiphe umlandu lathi sibone kungumlandu ukuthi lathi sibuyele sizogcotshwa, sizafuna ukuthi sizwisise ukuthi singumanisipala amanzi siwathenga njani? "
UMnu Thembani Mathuthu ongukhansila kaWard 7 okubandla leZanu PF uthi bazinikele ukusebenzela intuthuko yalelidolobho.
" Kusukela lamhlanje akusela ukuthi mina ngimelele uhlangothi kumbe oweZanu PF kumbe iCCC, Okokuqala ngizabambanisa iWard babekwazi ukuthi Kusukela lamhla sesiyinyanda inye sesisebenza ndawonye, kulemigwaqo engahambekiyo, kubelama sewage ahlala egeleza sikhangelele ukuqeda udubo lwamanzi njalo."
UMnu. Wellington Nare ukhansila kaWard 4 uthi ilokitshi elidala leJahunda lisalele emuva kakhulu kwenzentuthuko.
"IWard engiyimelayo indala kakhulu okokuthi ngilomlandu yokuthi ngisebenze lekhansili labahlali ukuze ngithuthukise iGwanda ngoba yiyo iWard elomlandu kakhulu nxa sikhangele intuthuko angiboni kuvuma ukuthi ngalesisikhathi esikiso abantu basebenzisa isambuzi esisodwa, ngizasebenza gadalala ukuze silungisise lezizinto."
UNkosikazi Fortunate Gundu okhethwe phansi kweWomen's quota kubandla leZanu PF uthi kuyajabulisa ukuthi njengabesifazana labo baphiwe izikhundla kwezombusazwe.
"Omama labo sebelamathuba yokuthuthuka kwezombusazwe kanye lakwezinye ingatsha, thina umsebenzi wethu ngowothuthukisa amaWard ethu njalo omama bayakhunjulwa na kulezinhlelo, nxa kulenhlelo zentuthuko omama bona bangena njani."
Ocubungula ezombusazwe uMnu Albert Moyo uthi kakholwa ukuthi kukhona okutsha okuzakwenziwa yilabo abakhethiweyo ekhansilini.
"Izinto lezi sezathunjwa ngezombusazwe nxa ngukhansila uvela kubandla eliphikisayo kawulitholi ithuba lokulungisa isigaba sakho ngaphandle kokuthi ucuphe esikhwameni sakho okungayisikho, banengi abakhankasa ngokungena ezikhwameni zabo, banengi abathole izihlalo ngokucupha ezikhwameni zabo kodwa akumelanga kubenjalo, ngabantu okumele bamele abantu ngokukhulumisane lezinye ingatsha zikahulumende ukuze kubelentuthuko."
Amanye amakhansila agcotshwe kumanisipala weGwanda lamhlanje agoqela, oMnu Thulani Moyo, Knowledge Ndlovu, Edgar Ncube, Dingilizwe Ndlovu, Siyanda Siziba lamakhosikazi Sithabiso Mpofu, Nomsa Sibanda kanye loThanathia Moyo.
Amakhansila la azahlangana njalo ukuzakhetha umeya weGwanda lomsekeli wakhe ngemva kokuthola imfundiso mayelana ngomsebenzi wabo.
Amakhansila aseBulilima, Mangwe, Masvingo lakwezinye indawo lawo afungiswe ukuqala umsebenzi NgoLwesihlanu.
Forum