UHeath Streak, owayengukaputeni waphinda waba ngumqeqetshi weqembu labesilisa elimelailizwe emdlalweni kakhilikithi, kasekho.
UStreak udlule emhlabeni ngeSonto ekuseni njalo ubulewe ngumkhuhlane wemvukuzane.
UNtombikayise Khumalo, okhule loStreak njalo obesebenza esikolo esasungulwa ngumuyi esifundisa abasakhulayo umdlalo kakhilikithi, uthi balahlekelwe kakhulu ngokwedlula kwakhe emhlabeni.
“Yisikhathi esinzima kakhulu kimi lesi ngoba ngiyilokhu engiyikho khona ngenxa kaStreak. UHeath Streak sikhule sonke eNyathi njalo ngithe ekuphendukeni kwami kweleSouth Africa ungithethe ngazosebenzela iacademy yakhe eyeHeath Streak Cricket Academy. Bengingazi lutho ngomdlalo kakhilikithi kodwa wangifundisa. Into ebengimthandela yona yikuba ubuthi loba ungaphazamisa ubekubizela eceleni akhulume lawe ngeSiNdebele akubonise kuhle kuhle, lalapho ongazwisisi khona ubesitsho ukuba umtshele ukuze akuchasisele kuhle. Ubengumuntu
owehlukileyo njalo silahlekelwe ngubaba, ngumfowethu, ngumngane. Ubungeke umbone ezondile uStreak, angikhumbuli ngimbona efuthelene. Mina ubehlala engibiza Mkhaya wami njalo ngeviki leyana okwathiwa usefile wangifonela wathi Ntombi ngiyazi abantu esebesithi sengifile kodwa angikafi loba nje seliseduze ilanga. Ngicela lisale libambene lezinye izisebenzi. Ngithe ngisithi Streak ungakhulumi njalo wathi yena ubuhlungu abuzwayo abusayenzi njalo uNkulunkulu nxa esevumile uzahamba,” kutsho uMaKhumalo.
Ocubungula umdlalo kakhilikithi, uDumi Praise Dlakama, uthi uStreak udlale indima enkulu ekuthuthukiseni lumdlalo kwele Zimbabwe.
“UHeath Streak ngumuntu sibili oncedise umdlalo kakhilikithi kulumhlubulo welizwe. Uncedise abafana abanengi ukuthi bacine bedlalela iqembu lesizwe njalo ngumuntu obelothando lomdlalo lo. Sibonile usungule iHeath Streak Academy loba nje icine itshintsha igama ngenxa yendaba ezenzakalayo kodwa lokhu akuntshintshi indlela akade eyiyo yona kubasekeli bomdlalo kakhilikithi ukuthi ngumuntu oncedise kakhulu ukuba uBulawayo athuthuke. Silahlekelwe kakhulu ngokutshona kwakhe uStreak,” kutsho uDlakama.
UElleta Nengomasha, okukhomishini yeSports and Recreation Commission, uthi umhlaba wonke jikelele ulahlekelwe yindoda emadodeni. Uthi ikhomishini le ikhala lomdeni kaStreak, obeseleminyaka yokuzakwa engamatshumi amane lathoba munwe munye. Ubhubhele eplazini langakibo eNyathi.
Kwezemguqu, iqembu leHighlanders litshaywe nge2 ka nya ngele Chicken Inn ngeSonto enkundleni yeBarbourfields Stadium emdlalweni weCastle Lager Premier Soccer League.
Ngokwesibili ukunqotshwa kweqembu leBosso kumncintiswano walonyaka oweligi ngemva kokuba linqotshwe ngempumela efanayo ngeviki eyedluleyo ngele FC Platinum.
Iqembu leTriangle United litshaye eleZPC Kariba nge 1 ka nya ngaseGibbo kuthi eleCaps United libe ngutshiki lobhanqa 0 ka 0 lele Black Rhinos.
Forum