Esabelweni se Matabeleland North Province, kunqobe ababili phakathi kwezihlalo ezilitshumi lantathu kwabakade bekhankasela ukumela izigaba ngezigaba edale lephalamende, kwathi elizweni lonke kwanqoba abangamatshumi amabili lanye phakathi kwezihlalo ezingamakhulu amabili lengxenye - 220.
Omunye wabanqobileyo esihlalweni seNkayi North eMatabeleland North, njalo engumphathintambo wogatsha olubona ngeziphathelane labesifazana kuhulumende, uNkosikazi Sithembiso Nyoni uthi ulokudana ngoba abesifazana basahanjiswa nyovane.
Umbono kaNkosikazi Nyoni usekelwe nguNkosikazi Sinqobizitha Nyathi owenhlanganiso ye Better Man Foundation, othi phezu kwembadalo ephezulu eyokuncintisa kukhetho, abesifazana bancindezelwa ngobulili babo, njalo labadala kabadedeli abatsha.
UNkosikazi Sandra Gama owenhlanganiso ye Girls Table uthi akufuzanga amabandla eyame kulokhu.
Osanda ukukhethwa ukuthi abe lilunga leSenate emele iMatabeleland North, ekubandla le Citizens Coalition for Change, uMnumzana Joel Gabuza laye uthi iphutha bayalibona.
Kodwa umgcinisihlalo weMatabeleland North kubandla le ZANU PF, njalo engumphathintambo kahulumende kulesi isabelo, uMnumzana Richard Moyo, uthi okunye okubangela ukuba inani labesifazana liqhubeke lisehla yikwesaba kwabo ukuncintisana labasilisa.
UNkosikazi Nyoni uthi kufanele kuqiniswe isisekelo sombuso esipha abesifazana amandla okuzimela kumkhankaso bekhulunyelwa yimisebenzi yabo.
UNkosikazi Nyoni wengeze wathi, ngobungcitshi babo laba, kufuze njalo befakwe kuma Economic Programs ukuze bethole imali zokubhalisa eNomination Court kukhetho oluzayo sebephatheka kwazamabhizimusi.
Kukhetho olusanda ukwedlula abancintise edale lephalamende bebekhokha amadola ayinkulungwane –US$ 1000, okubangele ukuthi abanengi behluleke ukungena.
Inhlanganiso ye Women for Leadership and Political Excellence ithi inani abanqobileyo laba, kalihambelani lokwalotshwa yiSADC Declaration on Gender and Development eyaphawula ukuba kuzihlalo lezi, ezingamatshumi amathathu ekhulwini -30 percent zizanikezwa abasifazane kumazwe abo, kodwa kwele Zimbabwe inani leli limela kutshumi, okubalela ngitsho labamele uzulu kumakhansila.
Forum