UMongameli wakwele Botswana, uMnu. Mokgweetsi Masisi, esenzele uMongameli Emmerson Mnangagwa amhlophe kulandela ukunqoba kwakhe kukhetho oluchothozwa ngitsho lamaqula enhlanganiso yeSouthern African Development Community (SADC) leyeAfrican Union, esithi aluqhutshwanga ngemfanelo.
UMongameli Masisi uba ngumkhokheli wesine wasezansi yezwekazi leAfrica ukutshayela uMnangagwa ihlombe ngokunqoba kulolukhetho lanxa iSADC leAfrican Union, okuzinhlanganiso ezimela amazwe ezwekazi leAfrica, zisithi ukhetho lolu aluphathwanga ngendlela eqondileyo.
Abanye babalisa uMongameli Cyril Ramaphosa wakwele South Africa, uMongameli Haige Geingob wakwele Namibia kanye loMongameli Samia Hassan wakwele Tanzania.
UMasisi uthi ukukhethwa kuka Mnangagwa ngamanani aphezulu kuveza sobala ithemba abantu base Zimbabwe abalalo kuye lombuso wakhe.
Ikhomishini ebona ngezokhetho, iZimbabwe Electoral Commission, ithi uMnangagwa wathola amavoti edlula izigidi ezimbili, 2,3 million, kwathi ayencintisana laye uMnu. Nelson Chamisa, omholi webandla eliphikisayo leCCC yena wathola aphansi kancane kwezigidi ezimbili, 1,9 million. Kodwa iCCC ithi kwaba lokuqilibezela kulolukhetho.
Kumbiko wakhe, uMasisi uthe ufisela uMnangagwa impilo ende njalo wathembisa ukuthi eleBotswana leleZimbabwe azaqhubeka edlelana kahle.
Kodwa ocubungula ezombusazwe, uMnu. Kudakwashe Zulu, uthi kuyadanisa ukuthi inkokheli yeSADC iqhubeka isenzela uMnangagwa amhlophe loba nje iqula lalumanyano elaliseZimbabwe lisithi ukhetho alwenziwanga kuhle.
“Ukuthi uyenzele omunye amhlophe wena uzwa ukuthi kulesehlakalo esithile, kutsho ukuthi lidla lonke. Mhlawumbe kukhona okwenzakala ensitha abakwenzayo. Okubuhlungu yikuthi abantu yibo abathwele nzima, bona abakhokheli besidla kuhle.”
Amazwi kaZulu agcizelwle nguMnu. Teddy Ncube, laye ocubungula ezombusazwe.
“Kutsho ukuthi kunkokheli yeSADC abavumelani lempumela ekhitshwe ngu Dokotela Mumba. Kutsho kukhona okungabembalaniyo, ugwalo luka Mumba aluvemalani lombono weSADC. Kutsho lokhu okukhitshwe nguMumba akuveli kuSADC.”
Osekela ibandala leZANU PF, umnunzana Witness Dube, uthi uyajabula ngokwenziwa yinkokheli yeSADC etshayela uMnangagwa ihlombe.
"Lokhu ukuthi bathethe isikhathi kutsho kade besalalele umsindo okhona, kodwa basebebona ukuthi yikugqubulana kwembuzi okungatsho lutho. Njalo kade bekhangela ukuthi inombolo zithini."
Isikhulumi sebandla leCCC, uMnu. Promise Mkhwananzi, uthi inkokheli yeSADC iyaphazamisa ngokutshayela uMnangagwa ihlombe khona kumgceke ukuthi ukhetho aluhambanga kahle.
UMnangagwa yena uthi ukhetho lwalukhululekile, njalo abeCCC bengazami ukuphazamisa ukuthula okukhona elizweni. Uthi bazabotshwa bajikelwe emajele.
Kusenjalo, eleBotswana lithi lizakwamukela ngezandla ezimhlophe abeZimbabwe ababalekela kulelozwe, ikakhulu uma bedinga ubuphepheli.
Ekhuluma lenthatelizindaba namuhla, umphathintambo wezomvikela, uMnu Kagiso Mmusi uthi bazakhangela ukuthi abafikayo bangaphiwa ubuphepheli kumbe bebuyiselwe emuva.
“Asingeke sivembele abafisa ukungena kweleBotswana. Esizakwenza sizakhangela ukuthi bangaba yiziphepheli yini, kumbe sibabuyisele emuva eZimbabwe.”
Uhulumende uthi uMnangagwa uzafungiswa ukuqalisa umsebenzi ngoMvulo.
Forum