Ibandla eliphikisayo eleCitizens Coalition for Change (CCC) lithi kalamukeli impumela yokhetho eyethulwe ngoMgqibelo ebusuku yikhomishini ebona ngezokhetho eyeZimbabwe Electoral Commission (ZEC).
Isikhulumeli sebandla leCCC, uMnu. Promise Mkhwanazi, wethule umbiko othi kabemukeli amanga anje abonwe liqula leSouthern African Development Community lele European Union Election Observation Mission abathe aluqhutshwanga ngemfanelo.
UMkhwanazi uthi kuyazikhanyela ukuba impumela yokhetho lolu iphekaphekiwe yiZEC isenzela ukuba kunqotshwe uChamisa.
Uthe basaphendla indlela yokuthi bazakubamba njani lokhu ngoba balobufakazi okuveza mgceke ukuthi kudlalwe ngabantu kukhetho lolu.
UMkhwanazi uthi bazakwazisa uzulu ngabazakwenza kusikhatshana esilandelayo.
Abakubandla leZanu PF baqale ukuthakazelela impumela yokhetho ingakethulwa nguNkosikazi Priscilla Chigumba ngoba umabhalane umkhulu obona ngezokwethulwa kwemibiko, uMnu. Nick Mangwana, eseyethule enkundleni yokuxhumana eye-X (Twitter) uChigumba engakawuvuli owakhe.
Kulandela okwethulwe nguChigumba, uMangwana ubikele uzulu enkundleni le ukuthi umdlalo usuphelile njalo bazabe bekhona ngomnyaka ka2030.
UMnu. ZIyambi Ziyambi, ophethe uhlangothi lwezemithetho utshele uhlangothi lukahulumende olubona ngezemibiko ukuba uMnangagwa uvotelwe ngabantu ngoba usebenzela uzulu.
Inhlaganiso yeSouthern African Development Community ithi kaluqhutshwanga kahle ukhetho lolu.
IZimbabwe Electoral Commission ithi uMongameli Emmerson Mnangagwa nguye onqobe kukhetho lukamongameli ngamavoti edlula okungamatshumi amahlanu ekhulwini – 52.6%.
Umbiko lo wethulwe ebusuku namuhla eHarare nguChigumba, umngcinisihlalo wekhomishini le, othe uMnu. Chamisa, owebandla leCitizens Coalition for Change (CCC) uthole amavoti ayisilinganiso sokungamatshumi amane lane ekhulwini – 44%.
Lokhu kutsho ukuthi uMnangagwa uthole amavoti afika phose izigidi ezimbili lengxenye - 2,350,711 kwathi uChamisa wathole ayizigidi phose ezimbili - 1,906,734.
Kusenjalo, kukhetho lwamalunga edale lephalamende, ibandla leZanu PF lithole izihlalo ezilikhulu lamatshumi amathathu lasithupha - 136 kwathi eleCCC lazuza angamatshumi ayisikhombisa lantathu - 73. Kulesihlalo esisodwa esilokhu singela muntu.
Forum