Ibandla eliphikisayo eleCitizens Coalition for Change-CCC, libika ukuba lijabule kulandela ukunqoba kwalo ezikhundleni eziyisitshiyagalonye - nine esabelweni seMatabeleland North, phakathi kwezilitshumi lantathu ezikade zincitisa ekumeleni uzulu edale lephalamende.
Ibandla leli lenelise ukubuyisa izikhundla elazithathelwa ngabe Zanu PF kukhetho luka2008 emaphandleni.
Lokhu kuyikufezeka kwezithembiso ezenziwe ngabasekeli beCCC kunsukwana ezedlulayo kumkhokheli wabo uMnumzana Nelson Chamisa, phambilini kokhetho emhlanganweni omkhulu oweRally awukhokhela eVictoria Falls wokukhankasela usekelo.
Omunye wabazamela lesisabelo edale leSenate, uMnumzana Joel Gabuza, uthi ukunqoba olunje bayaluchinsa ngoba bebehlala benqoba eBinga leHwange kuphela.
“Twalumba, siyabonga Mat North omuhle. Sijabule simanzi te ukwazi ukuthi iMat North imama constituencies ayi 13 kodwa njenge CCC sikwanisile ukuthui siwine amaBinga womabili lamaBinga amathathu besihlala sile five. ”
UMnumzana Mxolisi Sibanda ongomunye wasebethole ezinye zezikhundla ezamela iLupane West, uthi sekuyiminyaka indawo le ibuswa ngabeZanu-Pf.
Loba kunjalo, uSibanda uthi mkhulu umsebenzi ophambi kwabo.
“ILupane West ngiyananzelela ukuthi yindawo elugwadula, kuyadingeka ukuthi singezelele indawo elamanzi ukwenzela ukuthi abantu bazuze indlela zokuphila.”
Umgcinisihlalo webandla le Zanu Pf esabelweni se Matabeleland North, njalo osenqobe ukumela iMguza edale lephalamende, uMnumzana Richard Moyo uthi bazamile, kodwa kungasenani kwehlule kwabanye bakhe.
“Sizamile kakhulu ukuthi sisebenze kodwa kulama constituencies esisebenze kuhle kakhulu kuseMguza, eTsholotsho South, Nkayi North laseBubi kodwa ama councils asabalwa, mhlawumbe ekupheleni kwelanga sizabe sesikwazi ukuthi emakhansilini kumi njani kodwa khathesi sile four constituencies ese Zanu Pf.”
Umgcinisihlalo weCCC kusabelo sinye, njalo enqobe eBinga North, UMnumzana Prince Dubeko Sibanda, uthi limpumela iveza ukuba abantu bavote bekhangele sibisibili.
“Besivele sikhangelwelwa phansi, sitshiywa eceleni besiphathhwa njengomntwana wakomakhelwane, hatshi umntwana welizwe leli, ngenxa yalakhu, intuthuko yethu isalela emuva okwesibili silendawo lapho okwabulawa abantu ngesikhathi seGukurahundi amaTsholotsho womabili, amaLupane womabili anaNkayi womabili aphanjaniswa yiGukurahundi, yizo zezizatho izakhamizi lezi zibone utshintsho lufanele .”
Abe CCC bathi eyabo inhloso yikulwela uzulu edale lephalamende ukuze kubunjwe imithetho yokuthi abantu balumango bathole inzuzo kwezemvelo ebahlala phakathi kwazo ezigoqela amalahle eHwange, umfula uZambezi River, izihlahla zamagusu aweLupane leNkayi lokunye.
Kusenjalo, abe Zimbabwe Electoral Commission babika ukuba baqhubekela phambili ngohlelo lwabo lokubalwa kwamavoti ezabelweni zonke ze Matabelaland North anduba kwethulwe abanqobe esikhundleni sikamongameli welizwe.
Okunye njalo abathi basakwenza yikuhlolisisa inani labavotelweyo andubana amabizo abo aqoqwe ndawonye phambili kokudluliselwa esigodlweni selizwe iHarare.
Forum