Abantu abanengi emhlubulweni wangeZansi yeMandebeleni basola ikomishini ebona ngezokhetho eyeZimbabwe Electoral Commission ngendlela eqhube ngayo ukhetho izolo lapho abanye abathi babhalisela ukuvota bengenelisanga ukuvota ngoba amabizo abo engekho kuVoters roll.
Kodwa abeZEC bathi ukhetho luqhubeke kakuhle esabelweni lesi.
Izakhamizi zemangweni weMadali Village eGwanda, uthi ukuswelakala kwamabizo abanye ababhalisela ukuvota kuluhlu lwababhalisela ukuvota kuveza obala ukuthi iZEC kayiqhubanga kuhle ukhetho lwayizolo.
Lokhu kufakazwa nguMnu Petros Mukwena umhlali weTshitaudze.
“IZEC ayiqhubanga kuhle ukhetho ngoba amabizo abanye abantu ebetholakala kweyinye ipolling station, emakhaya ubusithi ungaliswela bekusiba nzima ukuthi uyebamba eyinye ipolling station ibizo lakho bekukhatshana abantu becine bengasayi ngokunjalo iZEC ibingalungiselanga lolukhetho kumbe singakuthatha ukuthi bebetshweliwe ukuthi benze njalo.”
Lamazwi agcizelelwe yisikhulumeli sebandla leCitizens Coalition for Change eZansi yemaNdebeleni uMnu Ntando Ndlela othi kukhona okunuka santungwana kubudlelwano beZEC kanye lebandla leZanu PF.
“Into edanisileyo yikuswelakala kwamabizo abantu kumapolling station abawajayeleyo njalo aseduzane labo, abantu abanengi bacine bengasenelisanga ukuvota ngoba bengatholi amabizo abo, kube yinto enkulu kakhulu esingazi ukuthi yinto ebeliphutha kumbe yinto ehlelwe yiZanu PF leZEC ukuze abantu bengenelisi ukuthi bavote.”
Kodwa uMnu Qhubani Moyo olilunga lebandla leZanu PF esabelweni seZansi yemaNdebeleni uthi ukhetho luqhutshwe kakuhle njalo amatafula abefakwe libandla lakhe phansi kwendawo zokuvotela kalani lozibani ngoba yiloba ngubani evunyelwa ukwenza intando yakhe khatshana lalapho okuvotelwa khona.
“Okwenzakala ngaphandle kwe300 metres yePolling station akulani lozibani obekusenzakala lapho engibone khona bekuyikuthi nje abantu nxa bevela khonapho abantu bethu labo babe lesiqiniseko sokuthi abantu abavela vota bangaki ukwenzela ukuthi sigcine idata yethu njengeparty bekungelani lokuthi umuntu atshelwe ukuthi avote njani kumbe ukuthi abuzwe ukuthi uvote njani.”
UMqondisi wogatsha lwezokhetho eZansi yemaNdebeleni uMnu Rabson Nyoni uthi baqhube kakuhle ukhetho esithi labo abangenelisanga ukuvota ngemva kokuswela amabizo abo kuVoters roll kungaba ngabantu abakade bengabhaliselanga ukuvota.
“UKhetho luqhutshwe kuhle izolo , sivule ngesikhathi ngo7 sasebenza ilanga lonke saze savala ngo7, ukuswelakala kwabantu ukuthi kabakho kuVoter roll yikuthi omunye ungena lapho okungafanelanga ukuthi ayekhona ahle acabange ukuthi kakho ahle ahambe, thina ngapha sazi ukuthi umuntu ongekhoyo uyabe engabhalisanga ukuvota ibizo aliziphumizi alingeke liphonguziphumela.”
Kuqhubeke kulokuthula lamhlanje endaweni ezitshiyeneyo zeMatebeleland South kungela zehlakalo zodlakela ezibikiweyo uzulu eqhubeka ngemisebenzi yakhe yensukwini elinde ukuzwa impumela yokhetho.
Forum