VICTORIA FALLS —
Abaphatheke kukhetho oluqutshwe ngoLwesithathu esabelweni seMatabeleland North bathi sebelinde ngabomvu impumela yalo lalabo ababavoteleyo ukuthi bebamele ngesikhathi abanye behlulekile ukuvota ngezizatho ezehlukeneyo ezigoqela ukusweleka kwamabizo abo, ukusilela kwamaphepha okuvota lokuphuza ukuvula kwezinye indawo zokuvotela.
Abasakhulayo bakulumhlubulo wangenyakatho yeMandebeleni inengi labo ebelivota okwakuqala empilweni yabo, babikwa bephume ngobunengi ngemva kwemikhankaso ethile eyenziwe ngaphambilini kokhetho lemfundiso yokuqakatheka kokuthi basebenzise ilungelo labo lokuvota.
Omunye wabasakhulayo laba nguMnumzana Ronald Hlatshwayo odabuka emangweni weLupane othi sebevotile ngakhoke sebemele impumela yalolu khetho.
“Bengikhangele abasakhulayo, besibanengi kakhulu. Abasakhulayo basuke basukuma bababanengi bayavota.Inengi lama youths asisebenzi so besitshelana ukuthi ukuze sithole imisebenzi asambeni siyevota.”
UMnumzana Charles Sibanda wedolobheni le Victoria Falls laye uthi sebedlelegilweni.
“Abantu bayawafuna, endaweni ezinengi kukhanya abantu bamelele ama results.”
Loba nje ulindelo lolu lukhona, kulabanye abengenelisanga ukuvota izolo ngesizatho sokusweleka kwamabizo azo, ikakhulu ku ward 11 eVictoria Falls, kodwa omele iZimbabwe Electoral Commision, eHwange West, UMnumzana Douglas Siatimba ongu Constituency Elections Officer, uthi lokhu kubangelwe yikuqunywa lokuginywa kamanye ama wards ngohlelo lokwehukaniswa kwemingcele olweDelimitation.
“Abantu baphiwa isikhathi sokuhlola amabizo abao ngesikhathi silungiselela, bakwenza lokhu, kodwa yibo futhi ababuya bayazisula bayakwamanye amawards yikho okwabangela ukuthi isystem zethu zibaswele laba.”
Umngcinisihlalo weZanu-PF esabelweni se Matabeleland North uMnumzana Richard Moyo uthi labo basalinde impumela, kodwa laye ukhala ngokusweleka kwamabizo abanengi.
“Abantu bavote kuhle kulokuthula akuzange kubelemisindo le violence, indaba yamabizo ngibona kwaphambaniseka ngesikhathi se delimitation abantu abanengi bebewaswele amabizo, yikho ubona labantu abavotileyo bebebalutshwana ngesizatho sokuswela amabizo abanye becine bekhalala.”
Abe ZEC bathi ngaphandle kohlupho lokuswelakala kwamabizo kwezinye indawo zokuvotela, ukhetho luqhutshwe ngokuthula njalo sebeqalisile ukubala amavoti ikakhulu awamakhansila agoqela aweVictoria Falls.
Esabelweni sangenyakatho yeMandebeleni, indawo phose zonke zivuliwe ngesikhathi izolo, njalo lama ballot papers abenele ezithitshini zokuvotela.
Umgcinisihlalo webandla le CCC uMnumzana Prince Dubeko Sibanda laye uthi ukhetho luhambe kuhle, njalo uthi balethemba lokuthi bazanqoba endaweni ezinengi.
Ukhetho lwalonyaka luza ngesikhathi inengi likhala ngokuwa kwesisindo somnotho, intengo ephezulu kanye lokusweleka kwamathuba emisebenzi.
Lokhu kusekwelwa luphenyo lwe Zimstat olwethule kunyanga ezimbalwa ukuthi abafika phose izigidi ezintathu-2.8 million e Zimbabwe kabalamisebenzi.
Forum