Sokusele amalanga ambalwa ukuthi ukhetho olokhulu eZimbabwe olwama Harmonised Elections lwenziwe. Amabandla ezombusazwe ayaphithizela egcwala ndawana yonke ekhankasela usekelo mhlaka 23 Ncwabakazi. IStudio 7 iqhubekela phambili isizwa uzulu ohlala ezigabeni lezi ukuthi ukhala ngani njalo abafuna ukumela lezizigaba bathini.
IPelandaba-Tshabalala yisigaba esitsha esadwetshwa yimingcele emitsha yikomishini ebona ngokhetho eye Zimbabwe Electoral Commission. Kulesi sigaba inengi labantu likhala ngokuswelakala kwemisebenzi.
Unkosazana Shiella Nongo ngesinye sezakhamuzi sale indawo. Yenake uchasisa ukuthi ufuna umeli onjani, "U-MP laye osimelayo ukuthi lathi Sithole umsebenzi sikwanise ukugcina abantwana laba since emgwaqweni lathi singavunyelwa ukuthengisa sithengisa khonapha okungekho emthethweni."
UCharles Ncube ohlala eTshabalala uthi ufuna uMP ozasebenza labantu enhlelweni zokuziphilisa. Uqhubeke ethi, "Umuntu ozangena abengumuntu olosizo phakathi kwesigaba sethu lathi sithuthuke sibengabantu sicela lathi sibelama project."
Kukanti uNkosazana Patience Nkomo owe Sizinda uthi wabhalisa ukuvota kodwa uzwa edakeka ngokhetho. Amazwi kaMankomo agcizelelwa nguNkosazana Sakhile Ncube ohlala ePelandaba.
"Hayi thina sikhathele si rejestile sibili kodwa sizwa siphela amandla nje ukuthi siyevota ngobe singaze siyevota akulanto entshintshiyo ngoba abantu bangkhona sibabona nxa bezo khampena kuphela bangavela bawine sebehambile.
Bakhangelana kubi abalandeli bamabandla ezombusazwe kulindawo ngesikhathi somkhankaso. UMnu San Paul Maplanka uzamela ibandla le Economic Freedom Fighters kulesisigaba yena uthembisa okunengi.
"Esifuna ukukwenza yikuvuselela uBulawayo.Silenhlelo ezinengi esizazenza within the next five years,ehh silohlelo lokuthi sizamu'kuthi sipushe iZambezi water ibe connected to Bulawayo.Sifuna ukuthi silungise ehh amaSewers lawa ahlala edubuka koBulawayo njalo sifuna sikhuthaze ukuthi iEducation ibeFree leMedication emaClinics ibeFree."
Ozamela ibandla le Zanu-PF kukindawo uNkosazana Cecilia Melody Vherenga uthi abantu kabavotele inguquko bazame ibandla lakhe ukuze izinto zilunge koBulawayo.
"Bantu bePelandaba Tshabalala vukani, for twenty-three years iOpposition ibusa koBulawayo sihamba sisiyabavotela ngoba besitshela ngeChange, khangelani koBulawayo akulaChange abayilethayo,likhangele lasePartini yabo kuyaliwa balwel'izikhundla balwela ukubangoMP ngoba bayakwazi ukuthi yikho laph'abadla khona abadingi ukuthi bamele abantu.Ngisukumela inhlupho zaboMama bonke amaYouth laboBaba bePelandaba."
Abancintisa bemele ibandla leCCC babili double candidate, kulomsekeli wesikhulumeli salelibandla uGift Ostallos Siziba onguye ofunwa libandla lelo loNkosazana Soneni Moyo. UMaMoyo uthi ungumuntu woqotho.
"Ngithembisa ukuba nguMeli ozakumela isigaba ngobuqotho eParliament ngilomthetho oqotho ozancedisa ulutsha labesifazana.Ngizakhuthala ngilethe intuthuko ebantwini ukusiza abantu abadala njalo ngibone ukuthi isigaba sami ngiyasimela eParliament kunhlupho abayabe behlangane lazo ngalesoskhathi njalo ukuthi siba lezkolo zikuqeqetshisa imsebenzi yezandla ukuze abatsha labadala benelise ukuziphilisa."
Kukanti uGift Ostallos Siziba uthi uzabisa intuthuko kulindawo.
"Okuqala yikulungisa ke ukubana sipushe indaba yedevelopment ,ukuthuthukisa indawo yakithi, ungakhangela khathesi abantu abanengi imigwaqo ilezigamba ke amanengi lamapot- hole kufanele kulungisiswe indaba yemigwaqo into eqakathekileyo development lokuthuthukisa indawo zakithi.Okwesibili yikulungiswa kwemthetho ke ezasupporta ke ukubana kube ledevolution ngenxayokubana indawo yakithi ungakhangela eMinyela kulendawo ke abantu abangela maphepha ezindlu so kufanele ukuthi sikwanise ukupusha indaba yedevolution fund."
Bakhuluma bedlephana ngemilomo abasekil balabo bacintisayo kulindawo. Abanye bathi ukuba le double candidate abamela iCCC kuzenza iZanu-PF ithathe isigaba se Pelandaba-Tshabalala kukhetho lukamhlaka 23 Ncwabakazi.
Forum