Amalunga amabandla ezombusazwe atshiyeneyo akhankasela ukuba ngamalunga edale lephalamende, emela iNkulumane, abe lethuba lokuveza abafisa ukusebenzela uzulu walumango, sekusele insuku eziyisithupha ukuba luqhutshwe ukhetho eZimbabwe.
Inkokheli zamabandla ezombusazwe ayehlukeneyo zihlangene lezakhamizi zeNkulumane koBulawayo, zikhuthaza uzulu ngokuqakatheka kokuphatheka kukhetho lolu ngokuvota. Okukodwa okuvele kulabo abafisa ukumela lumuzi edale lephalamende yikuba bonke bathembisa ukuthi bengavotelwa banqobe kulolukhetho bazaletha inguquko bathuthukise ilokitshi leli njalo bamele uzulu ngendlela emqotho.
UMnumzana Desire Moyo oncintisa emele ibandla eleCitizens Coalition for Change (CCC) ukhuthaza abahlali beNkulumane ukuba basukume ngelanga lokhetho bayevotela inkokheli ezizabamela ngokugcweleyo.
“Ngilifisela okuhle Nkulumane, ngilifisela ukuthula, ukubambana kanye lothando. Asihlaleni sisazi ukuthi ilanga lokuvota ngu 23 August kungedlula lapha sisala singabahlali beNkulumane. Ngicela sivotele inguquko, abakhokheli abaqotho abazaletha utshintsho kithi sonke. Ilizwe leZimbabwe likhululeke, kube yi win for everyone kube lama jobs, food, prosperity for everyone.”
UNkosikazi Nompilo Bhebhe ufisa ukuvotelwa owebandla leZimbabwe African National Congress uthi ulesifiso sokuthi angene ukuze lengezwe inani labesifazana edale lephalamende.
"It seems l am the only candidate ongumama obekhona,engukhangelelayo yikuthi let’s advocate for omama ukuthi sibe lezibindi zokuma kupolitics.Sikhangelele ukuthi in future nxa kuyikuthi kungenzeka ngiphumelele ngingene parliament l will advocate ukuthi kube lespecific number of seats awabomama if it means 50/50 kubeyinto vele egazatted ukuthi omama bekwazi ukuma eparliament equally labobaba”
Umnunzana Andrew Ndlovu omele ibandla leZAPU laye odinga ukumela lesisigaba ephalamende uthi bazimisele ukuthi balandele umthetho sikhathi sonke
“Engukhangeleleyo yikuthi as Zapu come 23 August ngingene ngimele abantu beNkulumane ngikhangele ukudefender iconstitution yeLizwe eyiyo abayivotela nge referendum.Ngibona njalo ukuthi umthetho ebunjwayo ilandela isisekelo selizwe ngibona ukuthi umthetho kumele iamand kulabantu phakathi there after kubonakale ukuthi ireferendum.”
Umnumzana Freedom Murechu inkokheli yabatsha ko Bulawayo ekubandla leZANU PF njalo emele ibandla leli kukhetho lelunga ledale lephalamende uthembisa inguquko eNkulumane nxa izakhamuzi zingabakhetha ukuba ngabameli babo.
“UBulawayo omuhle setshintshe waba ngokunye, imigwaqo ifile, akula manzi kuthi abantwana kabasela ndawo zokudlalela. Ama sewer ageleza yonke indawo, abadala babhadaliswa inkalakatha zama rates kodwa sifuna kube lotshintsho. Sekumele lathi sibakhangele silethe intuthuko eNkulumane koBulawayo.”
Unkosikazi Hilda Banda umhlali weNkulumane ukhuluma ngokwelatshwa akuthole mahala lamuhla phansi kohlelo lwezempilakahle oluqhutshwe lilunga leZanu PF elincintisa lifuna ukumela iNkulumane.
“Namuhla ngithabile, bengingazi ukuthi kulohlelo ngahlangana lalo. Into abangenzele yona bengingayicabangeli nxa angikaze ngiyithole. Ngiyagula ngila, amaphilisi ngiyawaswela ngoba ngingela mali yokuwathenga. Kodwa lamuhla ngize ngawathola. Ngijabulile kakhulu, uhlelo lolu luyasinceda kakhulu thina ogogo.”
Inhlanganiso eyezakhamuzi eye Bulawayo Progressive Residents Association (BPRA) ndawoye leye Election Resource Centre (ERC) zihlanganise izakhamuzi zeNkulumane ndawonye lenkokheli ezifisa ukubamela edale lephalamende. Lokhu kungeminye yemizamo eyokwehlisa ukuba abantu bahambe kukhetho bengabazi abantu ababameleyo okucina kudale ukuba abantu baphethe bekhetha ngokuba libandla liphi bengasakhangeli isimo somuntu.
Izakhamuzi zikhuthazwa ukuba zikhangele izititshi zokuvotela usuku lokhetho lungakafiki ngemva kokuba Inhlanganiso eye Zimbabwe Electoral Commission iqume iziqinti zokuvotela, abantu basondezwa duze lalapho abahlala khona.
Forum