Lanxa sokusele insukwana ukuthi ukhetho olukhulu lwama harmonised elections lwenziwe eZimbabwe, inengi labantu lithi alikabonisisi ukuthi lizavotela bani.
Inengi lentsha kulindawo lithi alivoti kukhetho lukamhlaka 23 Ncwabakazi ngoba bengananzwa zinkokheli.
UAkhona Tshuma, oleminyaka angamatshumi amabili lanye – 21, uthi kavoti.
“Nga register ukuvota kodwa angeke ngivote abasincedi ngalutho, amayouth. Abancedi lutho ama youth yeh awufuni kuvota.”
Omunye othi kavoti nguMelusi Moyo, oleminyaka engamatshumi amabili.
“Abasincedi ngalutho la. Balokhu besithembisa amanga bethi bazasincedisa. Akula.”
UVuyisile Ndlovu ngomunye osakhulayo othi kavoti.
“Ngile 20 years kuma elections angiboni ukuthi ngingavota ngoba sithola izithembiso zamanga. So, sithola izithembiso zamanga kahle kahle thina esiyabe sikukhangelele njengama youth siyabe sifuna ukuthi maybe kube lama courses esiwenzayo, sibe lezinto esizitholayo ezizosincedisa ngoba khathesi ngihleli angilalutho engilwenzayo empilweni.”
UThobekile Tshuma, ohlala eMpopoma, uthi abahlali balindawo bakhala ngokunengi okubahluphayo.
“Sikhala ngamagetsi ikakhulu emagetsini, asila magetsi, amanzi, imigwaqo yethu ifile lokungcono nje okusezibhedlela nje amaclinic okunye siyabe singela zimali uthole ukuthi umntwana uyagula kuyafunakala ama $10 asilawo. Kutholakale ukuthi ngiyagula kufunakala imali. Angilayo angisebenzi. Ngiyakwazi ukuthi ngizovotela ubani kodwa ngilesifiso sokuthi sicela asiqhubele izikhalazo zethu kuhulumeni wethu, ngoba asilabo abantu abazasikhulumela kabanzi kuhulumeni wethu njenge uouth yanamhlanje.”
Kodwa uNkosikazi Smelinkosi Moyo uthi uyavota ngeviki ezayo.
“Siwakhangelele njalo siyawathakazelela kodwa silezikhalazo njengabomama abatsha silezikhalazo. Asilamigwaqo. Imgwaqo ifile akulamsebenzi. Asila msebenzi asila lapho esisebenza khona. Abanengi sebengayekeliswa yizithembiso ezingathutshiyo, sebengayekela ngezithembiso ukuthi asilutholi usizo ngendlela esikhangelele ngalo, asilutholi usizo ngendlela esikhala ngalo. Sicabanga ukuthi kuthwa nxa ungumntwana ungakhala kuthwa wohluthuliswe khonapho khonapho, so thina asikwazi ukuthi sithuliswa nini njalo sizathula nini.
Abancintisa kukhetho bemele abamandla abo kulesisigaba bathembisa okunengi.
UMfundisi Sihle Muzenda, owenhlanganiso yeFreedom Alliance, nguye yedwa owesifazana oncintisa kulelisigaba, ukhuthaza omama ukuthi bamvotele.
“Mina ngingumuntu wesifazana, ngikhuthaza abanye omama ukuthi kasisukumeni ngoba ukusukuma kwami lokungivotela kwenu kufanana lokuthi lani liyavuma liyasukuma lingomama. Isikhali esingasetshenziswa ukuguqula lesisimo, ngibona ingathi mina ngithembisa ukuthi omama kuzaba le Women Empowerment. Ngisukuma ngingomunye owabo mama to give an example to women ukuthi bomama yisikhathi sethu mele sisukumeni.”
UPardon Tapfumaneyi uzimele yedwa independent candidate uthi uzaguqula lesi sigaba.
"Mina ngiyinzalo yase Mpopoma leMzilikazi ngibuye ngenhliziyo yami yonke. Khangelanini izindlu esihlala kizo, eMabuthweni abantu basheya ama bathroom lama toilets singene izititshi ziyadubuka, abantwana bayafa nge njengu. Amaclub lapha akade sihamba khona kufile, imigwaqo ifile, amanzi kakula amagetsi akula imisebenzi kakula ama factory avalili. Lingavoteli iparty votelanini i indipendent candidate."
Osakhulayo uAdmire Masikati uzamela ibandla le Zanu-PF uthi uzabisa ukubambana emphakathini
“Ngizasebenza gadalala labantu bonke abase Mpopoma kungakhathalekile ukuthi uvela kuliphi ibandla, kungakhathalekile ukuthi ungubani. Indlela engizasebenza ngayo ngeyokuthi abantu bonke abase Mpopoma Mzilikazi Constituency sizabe sisebenza labo. Ngizakhipha ibhatshi yokuba yi member ye ZANU PF kodwa ngibe ngu MP wabantu bonke jikelele.”
Ozamela ibandla le Citizens Coalition For Change CCC uDesmond Makaza uthi ibandla lakhe lizabisa intuthuko.
"Sifuna izikolo ezintsha njengoba ngike ngakhuluma phambilini ukuthi we want new schools, kumele sibe le ICT abantwana bethu bebe lama computer, befunde ama computer. Akuselanto eyenzayo elizweni kungasetshenziswanga ama computer. Kulendaba esiyifisayo kakhulu ku region ye Matebeleland, i issue eye devolution. Leyo ndaba is a very critical and important issue within the region."
Ukukhankasela ukhetho luka 23 Ncwabakazi ngamabandla ezombusazwe luyaphambili koBulawayo laseZimbabwe yonke jikelele.
Forum