Abafelokazi bakhala ngokungananzwa nguhulumende kulandela ukubhubha kwamadoda abo, awalwa impi yinkululeko.
Bebekhonona namuhla ngesikhathu kunanzwa usuku lwamaqhawe olweNational Heroes Day emathuneni amaqhawe eNkulumane koBulawayo lapho obekuleziphathamandla zikahulumende.
Bebekhala ngokungatholi imali eyeneleyo eyepentsheni, ukugugudeka komnotho welizwe lokungalungiswa kahle kwamanye amangcwaba lapho okulele abalwa impi yenkululeko. UNkosikazi Melina Chidanika uthi umkakhe owabhubha ngomnyaka ka2018 lokhe engakayakhelwa ilitshe loba abanye sebafakelwa.
UNkoskazi Charity Sibanda uthi umkakhe sewafakelwa ilitshe kodwa lokhe engakatholi imali enikwa abafelokazi bamaqhawe eZimbabwe.
UNkosikazi Granny Masuku lemuli yakhe bavule emphakathini ilitshe abazakhele lona ethi lemali abayiphiwa nguhulumende incane.
UMnu. Andrew Ndlovu laye usola ukungafakwa kwamatshe nguhulumende.
Umgcinisihlalo webandla leZanu PF koBulawayo, uMnu. Jabulani Sibanda, uthi baphakathi kokulungisisa uhlupho lwamatshe eNkulumane Heroes Acre.
Lokhu kusekelwa nguMnu. Mthuli Ncube, umgcinincebo kahulumende.
Bekulenkulungwane lenkulungwane zabantu namuhla ebezithe gwaqa emathuneni amaqhawe koBulawayo abanye bezobeka amaluba emathuneni ezihlobo zabo.
Umphathintambo wedolobho lakoBulawayo uNkosikazi Judith Ncube, uhlole ibutho ebelikule indawo wabala umbiko kaMongameli Emmerson Mnangagwa.
Inengi elingene umkhosi wanamuhla lijabuliswe ngemidlalo ehlukeneyo lokunye.
Forum