UMongameli Emmerson Mnangagwa uthi eleZimbabwe kalisoze libuswe ngabathengisi abadlelana lenkokheli yamazwe entshonalanga afakelwa amalunga ebandla leZanu PF izijeziso zenotho.
UMnangagwa wethule amazwi la namuhla eNational Heroes Acre eHarare ngesikhathi kunanzwa usuku lwamaqhawe njalo kubekwa uAmbassador Johannes Tomana, owayemele eleZimbabwe kwele Democratic Republic of Congo, loRetired Commissioner General Milton Siziba, obeyisiphathamandla kuhlangothi lukahulumende olukhangelane lentilongo eZimbabwe.
Utshele inkulungwane lenkulungwane zabantu embuthanweni lo ukuba kumele uzulu avotele ibandla leZanu PF kukhetho oluzaqhutshwa ngeviki ezayo.
"Alingeke libuswe ngabathengisi abalandela abantu ababesincindezela. Ngeke kwenzeke lokhu. Lesi yisinqumo amaqhawe ethu athi uTomana loSiziba ababesimela."
UMnangagwa uthe ibandla lakhe yilo lodwa elingavikela eleZimbabwe ekubusweni ngabamhlophe athi aafuna ukuphenduka eZimbabwe nxa kungavotelwa amabandla aphikisayo.
Uphinde wasola izijeziso zomnotho ezafakelwa inkokheli yebandla leZanu PF ngamazwe entshonalanga, agoqela eleMelika eleBhilithani lamanye akumanyano weEuropean Union.
Umsekeli wesikhulumeli sebandla leCitizens Coaltion for Change, uMnu. Gift Ostallos Siziba, usola amazwi kaMnangagwa esithi ibandla leZanU PF yilo elilabathengisi.
"Umbuzo esizawubuza yibaphi abathengisi kuleli. Babetshotsha sakubona ku-gold mafia.Imigwaqo ifile, izibhedlela zifile. Konke lokhu kubangelwa yiZANU PF. IZANU PF ibisela umhlabathi emakhiweni. Abathengisi ngobani? Babisela amakhiwa umhlabathi."
Lokhu kusekelwe yingcwethi kwezombusazwe ezimeleyo, uMnu. Herbert Chamuka.
"Siyakwazi ukuthi bazanqoba. Kodwa bazakwenza lokhu ngokwethuselwa. Batshaya abantu, bayethusela. Kabafuni kuphikiswa bafuna ukubusa bodwa."
Kusenjalo, abakuhulumende lemdeni kaTomana loSiziba bathi ilizwe lilahlekelwe ngamaqhawe abelwela uzulu.
UMnu. Tshinga Dube, olilunga lebandla leZanu PF njalo okudale leCentral Committee, uthi uSiziba, owalwa impi yenkululeko ekuZIPRA, wayeyindoda emadodeni.
"USiziba yila amajaha abuya e Zambia ngama 70s, babuya sesilungiselela into okwakuthiwa yi turning point. Sesifuna ukutshayana okusegcekeni. Bahamba e Khohima e Zambia, baphuma lapho baqala ukusebenzisa izikhali ezinkulu. Wakhalipha kakhulu wacina ese commander ibattalion.”
Indodana ka Siziba uMnu. Peter Siziba, ubonge kakhulu uMnangagwa ngokunikeza uyise isicoco seqhawe lesizwe.
"Okwenzakale lapha yikho esikwaziyo esintwini. UMlimu alibusise ngokusikhokheli elizweni. Likhokhele abantu abantu bakhe, aligcine alandisele impilo."
Ingcwethi kwezombusazwe ezimeleyo, uMnu. Devine Hove, uthi kuqondile ukunanza amaqhawe elizwe.
"Ilanga leli liqakatheke kakhulu ngoba sekuhlanganei ilanga lamaqhawe njalo sibeke ababili. Ilizwe leli labuya nzima. Kwakungelula labo abalwisa uhulumende wamakhiwa. Ubaba uTomana ube ekulezi ezomthetho ukunceda ukuthi ilizwe lethu libe lomthetho lokulawula kuhle."
Kulabanye abantu abangananzi usuku lolu abathi ayilunganga indlela okukhethwa ngayo amaqhawe eZimbabwe.
Forum