Umqeqetshi weqembu leHighlanders uBaltemar Brito uthi baxotshanisa impala ezimbili njengoba kulimpelaviki bephatheka kumidlalo yenkezo yeChibuku Super Cup ikanti yibo futhi abahlezi phezu kwengalane yemiklomelo esigabeni seCastle Lager Premier Soccer League.
Ekhuluma phezu kwamalungiselelo eqembu lakhe phambilini komdlalo walo leleBulawayo Chiefs ngeSonto owehlandla lakuqala elomncintiswano weChibuku Super Cup, uBrito uthe ukhangelele ukuphakamisa isicoco lesi.
“Lonyaka sizitshele ukuba kumele sibe sendaweni ephezu kwalapho esiqede sihlezi khona engalaneni yemiklomelo kodwa kulumdlalo wenkezo nxa singabaqeqetshi abaqotho kumele sidlale sijonge ukunqoba. Nxa singezwakala sisithi kasifuni ukunqoba abakhokheli beqembu kuyabe kumele basixotshe sibili,” kutsho uBrito.
Iqembu leBosso lonyaka laziwa ngokuqakathekisa ukuvala igedi kodwa uBrito uthi lokhu akungeke kusebenze emdlalweni wenkezo yeChibuku.
“Kutshiyene ukudlala kuligi lokudlala kumdlalo wenkezo ngoba nxa singaqakathekisa ukuvala igedi asingeke sithole umklomelo owodwa kodwa kuyabe sekumele sitshaye imbekwa. Ngalokho ke kuzakuba lotshintsho olukhulu ekudlaleni kwethu,” kugcizelela uBrito.
Umqeqetshi weqembu leBulawayo Chiefs omutsha uJohanisi Nhumwa uthi ukhangelele umdlalo onzima.
“Ngumdlalo omutsha lowu kodwa engikwaziyo yikuba iqembu leBulawayo Chiefs lilabadlali abangenelisa ukunqoba yiloba yiliphi iqembu,” kutsho uNhumwa.
UNhumwa uthethe isikhundla esitshiywe nguJoseph Sibindi ekuqaleni kweviki.
Iqembu leBulawayo Chiefs yilo eliphethe inkezo yeChibuku Super Cup ngemva kokuyiphakamisa kumncintiswano wanyakenye ngemva kokunqoba amaqembu agoqela lona eleHighlanders.
Imidlalo edlalwe namhla eyesigaba sakuqala eseChibuku Super Cup iphele kanje;
Ngezi Platinum Stars inqobe iTriangle nge 2 ka 1 ngaseBaobab, iqembu leManica Diamonds linqotshwe nge 6 ka 5 ngeleBlack Rhinos ngaseGibbo, iqembu leChicken Inn linqobe ele Green Fuel nge 1 ka nya ngaseLuveve, iqembu leFC Platinum litshaye eleYadah nge 4 ka nya ngase Mandava, kuthi iqembu leDynamos linqobe eleSimba Bhora nge 1 ka nya ngaseBarbourfields.
Kweminye imidlalo yangeSonto iqembu leCaps United lizadlala leleHwange ngaseBata kuthi iqembu leHerentals lizemukela eleZPC Kariba ngaseMandava.
Emidlalweni yeFIFA Womens’ World Cup edlalwe namhla eleAustralia linqobe eleFrance nge 7 ka 6 ngemva kokutshaywa kwembekwa kuthi eleEngland litshaye eleColombia nge 2 ka 1.
Limpumela itsho ukuba eleAustralia lele England asefinyelele kusigaba se semi – final ndawonye leSpain kanye leSweden.
ISpain leSweden zizadibana ku semi – final yakuqala ngoLwesibili kuthi iAustralia leEngland zizangqikilana ku semi – final yesibili ngoLwesithathu.
Forum