Umkhokheli webandla eliphikisayo ele Citizens Coalition for Change uMnumzana Nelson Chamisa usethembise izakhamizi zeDete leVictoria Falls ukuthi engakhethwa kulinyanga ukuba ngumongameli welizwe uzaletha intuthuko kuzo zonke indawo zelizwe.
Esethula imibono emqoka yebandla lakhe egoqela intuthuko, ukuqeda ubusela, ukugcinwa kwamasiko kanye lokuxazulula udaba lwe Gukurahundi, uChamisa utshele abalandeli bakhe ukuba lokhu kuzafezeka kuphela nxa bengamvotela kukhetho oluzayo emalangeni alitshumi lambili.
"Sibuye ukuzolazisa ukuthi kufuze lazi ukuthi yonke into esiyenzayo UNkulunkulu uphakathi kwayo. Thina sizimisele ukusebenzelana UNkulunkulu lani ngokuthembeka. Akufuzanga sibe njengalaba abeba kusakwamalanga okufana legolide, i-Lithium, i-Chrome lezinye ezemvelo ezibalulekileyo. Siyalithembisa njalo ukuthi indaba ye Gukurahundi sizayilungisa, sibuye njalo silethe intuthuko sigaba ngasigaba ngokulinganayo elizweni lonke.
UMnumzana Peter Muleya osekela ibandla leli esesigabeni se Jambezi uthi izinga lobuyanga emaphandleni liyesabeka, njalo kakulasizo abalutholayo. Uthi mihla lamalanga babikelwa ngohlupho, njalo inengi selidlwengula.
“Akulanto esiyiholayo ngitsho baholisana khonale eMshonaland ngapha eMatabeleland kungelalutho abantu bayadubeka lokudla kakukho labadadlala abale 70 years kusiyaphezulu bayadubeka.”
Unkosikazi Lethiwe Shoko yena obesuka eLukosi ukhala ngokusweleka kwamathuba emisebenzi.
“Abantwana bayahlupheka emagoli bedinga imisebenzi ngakho esikukhangeleleyo yikuthi umongameli wethu akulungise lokhu ngoba isimo sabantwabethu sibi yikho sifuna ukuthi ujaha lo avule amathuba emisebenzi ukuze bephenduke.”
UChamisa uthi engakhethwa uzaba labaqondisi –ministers abazakhethwa ngabantu kuzigodlo zonke. Uthi njalo amandla okhetho lwamakhansila labamele idale lephalamende azavela ebantwini njalo abazakhipha laba loba siphi isikhathi nxa bengasafezi izifungo zabo zokubamela.
Uchaze njalo ukuba ngoMvulo lo, bazakuthi gwaqa behluzisisa ivoters role engeza ukuba kunengi okungahambi kuhle phakathi kwayo.
Kusenjalo, umlawuli wedale lephalamende uMnumzana Jacob Mudenda laye obebuthanise abebandla le Zanu-PF emaphandleni eKachechete NgoLwesihlanu utshele abalandeli ukuba kufuze bakhethe inkokheli ezabamela kuhle njalo ilobudlelwano lomongameli Emmerson Mnangagwa.
"Liyazibuza ukuthi intuthuko iza njani? Impendulo yokuthi intuthuko iza ngedombo. Khethani ozalimela edale lephalamende ozaba lobudlelwano lobabawethu uMnanagwa njalo lami ngizalimela edale lephalamende ngokusekela ngilandela lomthetho."
Abebandla leZanu PF babe lomunye umhlangano njalo eMvuma okhokhelwe nguMongameli Emmerson Mnangagwa. Inengi labakade bekulumbuthano ngabebandla lokholo lwesipositoli abe Johane The 5th of Africa International Apostolic Church.
Forum