Kukhethwe induna ezingamatshumi amathathu lasithupha edale leNational Council of Chiefs kukhetho oluqhutshwe elizweni lonke izolo.ikhomishini ebona ngezokhetho eyeZimbabwe Elections Commission ithi lolukhetho luhambe kakuhle elizweni lonke jikelele. EZansi yemaNdebeleni induna ezisakhulayo uBidi uNqaba Ndiweni weMatobo/Kezi leNduna uSitaudze uDavid Mbedzi weBeitbridge abaleminyaka yokuzalwa engamatshumi amathathu-30, ngabanye balabo abakethiweyo.
UKhetho lwayizolo lwedale leNational Council of Chiefs lwamukelwe ngenjabulo olubone kukhethwa induna ezinhlanu ngesabelo sinye seManicaland, Masvingo, Midlands kanye leMatabeleland North, kuthi ezabelweni zeMatabeleland South, Mashonaland Central,Mashonaland West kanye leMashonaland East kukhethwe abane ngesabelo sinye.
Umongameli weNational Chiefs Council uNduna ngomunye walabo abakhethiwe eMasvingo.
Ezansi yemaNdebeleni iNduna uMphini uJabulani Ndiweni weBulililima yena oleminyaka yokuzalwa engamatshumi amathathu lambili kanye leNduna uNdube uNonhlanhla Sibanda weInsiza oleminyaka yokuzalwa engamatshumi amathathu lasitshiyangalombili bakhethwe ndawonye leNduna uSitaudze loBidi.
Induna uMathema uKhulumani Mathema weSitezi obephatheke kulolukhetho uthi luqhutshwe kakuhle.
“Ukhetho luhambe kuhle kakhulu olweMatabeleland South bawinile amacandidates kodwa engikunanzeleleyo kungena amaChiefs amatsha engithemba ukuthi bazasebenzisa amandla abo ukuqhuba umsebenzi weChiefs Council.”
Induna uMbiko Masuku weMatshetsheni obekudale leChiefs Council kuvotwa izolo uthi abakhethiweyo laba kuzamele bazinikele emsebenzini asebengene kiwo.
“Sikhangelele ukuthi bazinikile emsebenzini abazahlangana layo ngaphandle kwakho konke ukuthi usebenze kuhle yikuthi uzinikele emesebenzini oyenzayo,sikhangelele ukuthi bazazinikela , bawenze ngokuthembeka bawenze ngenhlinziyo zabo zonke lumsebenzi osuthe bahlangana lawo.”
Lamazwi asekelelwe yiNduna uMarupi uOuheng Nare weSelonga.
“Abantu esibakhethileyo njengoba siqalisa ukubakhetha kodwa ngendlela esibakhangele ngayo bazasebenza ngendlela eqondileyo akula esingathi siyamsola ukuthi engadonsela emuva kumbe njani.”
Induna uMayenga uNgwenyama Fuyana weMatobo uthi ukhetho lwabo luqhutshwe ngokuthula njalo ufisa uzulu aziphathe ngendlela izinduna eziziphethe ngayo lapho ziqhuba ukhetho.
“Amakhosi abencintisana ebehleka yonke ebambana izandla kungathi ngabantwana bomuntu kodwa bencintisane lalaba abaphumileyo bayazihlekela bathabela laba asebengenile kuChiefs Council yiyi umfanekiso engicabanga ukuthi ngabe uzulu uyawubona kuqakathekile ukuthi abantu sibanxuse babekhona abanye bezobona ukuthi kuhamba njani.”
Ezinye induna ibezikudale leChief’s Council kungaqhutswa ukhetho lwayizolo zibalisa Induna uMasendu, uGwebu loSibasa.
Forum