Umthethwandaba waphezulu oweSupreme Court wamukele namuhla isicelo sebandla eliphikisayo eleCitizens Coalition for Change, esokuthi amalunga alo akoBulawayo avunyelwe ukuncintisa kukhetho luka mhlaka 23 August ngemva kokuvinjwa kwabo lidale leHigh Court.
Esipha isinqumo sakhe edale leSupreme Court, uMahluli Hlekani Mwayera, wazise ukuba isinqumo seHigh Court siphambana lemithetho yelizwe.
Lokhu kutsho ukuba amalunga aweCCC alitshumi lambili labanye abakumabandla atshiyeneyo sebevunyelwe ukuncintisa kukhetho lwalonyaka.
Ekhuluma emthethwandaba weSupreme Court, igqwetha lalaba bantu, uSikhwicamfundo Welshman Ncube, uthe bayathokoza ngesinqumo lesi.
"Udaba lwama MP akoBulawayo soluphelile. iSupreme Court ithe ijugdment yeHigh Court kayikhonhle. Siyathaba ukuba sekube lokuphumelela."
Bekulabanye abafuna ukuncintisa ezikhundleni zokuba ngamalunga edale lephalamende koBulawayo labo abavunyelwe ukuncintisa, akade bemelwe ligqwetha, uMnu. Moses Mahlangu, othi kuyathokozisa okwenzakele namuhla.
"Bekuphazamise kakhulu ngoba omunye umuntu owayengekho edale ubesithi babengekho. Bayaqhubeka ngokukhankasa."
Obhalise efuna ukuncintisa emele iZANU PF eMzilikazi-Mpopoma, kukhetho lwalonyaka, uMnu. Admire Masikati, uthi ibandla lakhe kaliwesabi amalunga eCCC asebephendukile kukhetho.
"Ngokubona kwami ukuphenduka kwabo kuhle ngoba kunika abantu ithuba lokuba bakhethe abantu abazabamela. Angesabi ngoba umdlalo ulabanqobayo labanqotshwayo."
Kusenjalo, umthethwandaba oweConstitutional Court uzakwahlulela udaba lokuba ofuna ukuncintisa kukhetho lukamongameli ezimele, uMnu. Saviour Kasukuwere, avunyelwe ukuncintisa kukhetho lolu.
UMahluli Paddington Garwe ube lomhlangano lamagqwetha kaKasukuwere namuhla, bekhangela ukuba lungahlulelwa na ngesiphangiphangi kumbe hatshi.
Igqwetha lika Kasukuwere, uMnu. Method Ndlovu, utshele intathelizindaba ukuba udaba lolu luzangena eConstitutional Court ngoLwesibili ngeviki ezayo.
Ayaqhubeka amalungiselelo okhetho elizweni amabandla ezombusazwe enyakazela elizweni lonke ekhankasela ukuthola usekelo lokuvotelwa kukhetho lwale inyanga.
Forum