Amapholisa eMatebeleland South athi akasoze ayekethisa ukubopha yiloba ngubani ozaphatheka kudlame lwezombusazwe ngalesi sikhathi sokulungiselela ukhetho lwalonyaka. Lokhu kuvele lapho kuvulwa okusemthethweni inkamba zamapholisa ezincane ezimbili emalokitshini aweGwanda ezakhiwe yizakhamizi.
Ekhuluma emkhosini wokuvulwa inkamba zamapholisa emalokitshini aweSpitzkop leJacaranda ngoLwesibili, uAssistant Commissioner Peter Sibanda, osaphethe isikhundla somkhulu wamapholisa eZansi yeMaNdebeleni, ukhuthaze uzulu kulesi sabelo ukuthi alondoloze ukuthula ngesikhathi sokhetho.
“Singamapholisa kasihambelani lobudlwangudlwangu,njengesabelo sizigqaja ngokuthi sihlalisane kakuhle laloba siyimihlobo etshiyeneyo njalo sihlezi sizijabulele.Ukhetho luyeza ludlule, lusuku nje , akula sidingo sokusebenzisa udlame ukukhankasela ukhetho , kuhle ke ngoba lezitokisi sezizinengi.”
Uphinde wathi inani lamacala adalwe kulesisabelo lonyaka aphezulu lapho kuqathaniswa lesikhathi esifanayo nyakenye.
“Ubugebengu busibisela emuva njalo ngele saphumelela nxa kulobugebengu emphakathini.Ukudalwa kwamacala kulesisabelo kuqonge ngesilinganiso setshumi lantathu ekhulwini 13% lapho kuqathaniswa lanyakenye ngesikhathi esifanayo kuthi lapha eGwanda amacala aqonge ngesilinganiso setshumi ekhulwini 10% okulibanga elingavunyelwayo esipholiseni, kungakho ukwakhiwa kwalezi nkamba zamapholisa kumele kwehlise inani lamacala.”
Umphathintambo obona ngezenzakala eZansi yemaNdebeleni uMnu Abedinico Ncube uthi ukuvulwa kwenkamba zamapholisa eSpitzkop leJacaranda kuzamele kulondoloze ukuthula.
“Sesilahlekelwe zimpilo zabantu bakithi abanengi kakhulu bebulawa yizigangi, akulamuntu okusamele abulawe, akulamuntu okumele atshotshelwe, akulamuntu okusamele akwanyulelwe indlu, mapholisa nansi inkamba ngale belikhatshana.”
UMnu. Hloniphani Sibanda, olilunga lekomithi ebikhangele ukwakhiwa kwenkamba yeJacaranda, ubonge kakhulu izakhamizi ngendlela ezincedise ngayo esithi izigebengu zibathwalise amagabha avuzayo.
“Labantu kwasekusenzakala emini befuna ukubanjwa besezindlini kwenza ukuthi sahlanganisa ingqondo njengabahlali beJacaranda ndawonye lobukhokheli bethu kwaphuma umbono yokuthi asizameni ukuthi kube lepolice base phakathina kwethu, ungabona abantu bebiza amapholisa ukuthi buyani lizohlala phakathina kwethu kutsho ukuthi balobuntu njalo bahlelekile.”
Amapholisa abike njalo ukuthi inani lezehlakalo zokudalwa kwamacala kulesi sabelo lasedolobheni leGwanda liya liqonga. Amacala avame ukudalwa eGwanda abalisa ukubulala, ukulwa, ubusela kanye lokudlwengulwa kwabesifazana
Forum