Bekungasibantu kuyibunyonyo abalandeli bebandla leZanu-PF bebuye ngobunengi emhlanganweni omkhulu owestar rally, owenzelwe eMkhithika Primary School eCowdray Park koBulawayo kukhakhanselwa ukhetho lwama harmonised elections luka mhlaka 23 Ncwabakazi.
Engakakhulumi emhlanganweni lo, uMongameli Mnangagwa uvule okusemthethweni isibhedlela esitsha ese Cowdray Park Health Centre esakhiwe yimali evele kuhulumende weBhilithane phansi kogatsha lwe Department of International Development.
Isibhedlela lesi silemibheda engamatshumi amabili njalo sizaba labodokotela laboMongi abahlala khonapho.
UMongameli Mnangagwa uthe izabelo zonke zelizwe zizathola isibhedlela esinje.
"Kuvulwe iclinic namuhla, elezinto zonke ezifunekayo yizigulane. Sizakwakha amanye angu 30, eyokuqala sayakha eHarare eyesibili ilapha. Sizakwakha amanye ayi-28 amaclinic afana layonale iZimbabwe yonke."
Isibhedlela lesi samkelwe ngenjabulo nguSikhwicamfundo uMthuli Ncube, okhangelelwe ukumela ibandla leZanu-PF edala lephalamende kules’isigaba.
"Uvule iclinic khonapha eCowdray Park, ukuthi yi clinic kodwa vele yisibhedlela its well equipped its got very modern equipment imtshins enza yonke into. Abantu be Cowdray Park bazathaba kakhulu okumangalisayo, njalo umangameli utshiye Ieambulance ezabe ithwala izigulane abantu besiyasizwa eclinic. Ngingathi laba abaqhatshiweyo kulabantu abasuka khonapha eCowdray park sebeqhatshiwe eClinic khonaphana ngoba ngani hayi kuzahamba kuhle sibili."
UMongameli uyephambili esithi abamabandla aphikisayo ayibo ababephethe ikhansili yakoBulawayo kusukela ngo2000 bayekela idolobho leli lisifa kodwa uhulumende wakhe useleminyaka emithathu esevuselela uBulawayo.
"Sasihlala sisithi koBulawayo koNtuthu ziyathunqa liyazizwela lani. Kodwa i-second republic ihlale phansi yathatha injongo eyokuthi iBulawayo sifina ukuthi ibuyele koNtuthu ziyathunqa ,ibe ngu Ntuthu ziyathunqa eyayiyikho khona kudala."
Utshele abalandeli beZanu-PF selinqobile kulolukhetho lona lungekenziwa.
"Mhla ka 23 August, sifuna ukuthi sibhode sivotela iZANU PF , 23rd August siwine siwine lomdumo. Lamhla ngifunutshela zulu ukuthi sonke siyakwana eskhwameni se ZANU PF. Ama local authorities wonke ngawe ZANU PF iparliament ngeye ZANU PF zizawina."
Umhlali weCowdray Park, uMnu. Mabubane, uthe iZanu-PF phansi kuka Mthuli Ncube ilethe intuthuko enkulu emangweni lo.
"Bekukuhle kakhulu lezakhamizi ziphume ngobunengi eCowdray park ngobunengi bazo ngoba okwenze ziphume izakhamizi zinanzelele idevelopment work eyenziwe libandla le Zanu Pf . I aspiring candidate engu baba uMthuli Ncube. We have seen i development esiyenzakele nje in a short space of time for the past 20 years asizange siyibone kuma opposition parties."
Ohlaziya ezombusazwe uMnu Effie Dlela Ncube uthi amabandla abotshela uzulu iqiniso nxa ekhankasela ukhetho hatshi amanga ngoba imali yokwakha isibhedlela lesi ayiveli kuhulumende.
"Sokuqanjwa izinto ezingayisizi , hayi akufanelanga kube njalo. Ukwethembeka yikho okuqakatheke kakhulu. Abantu kumele abasezihlalweni bathembeke, abafuna ukubasezihlalweni bathembeke ukuthi izinto bazenza ngendlela efaneleyo njalo bazenze ngendlela efaneleyo,bavimbele icorruption bakhulume iqiniso kuso sonke isikhathi."
Imizamo eyeStudio 7 yokuthola imibono yabesigodlo sommeli weBhilithane eZimbabwe, ngokusetshenziswa kokhwakhiwa kweCowdray Park Health Centre, njengesehlakalo sentuthuko elethwa nguhulumende weZanu PF njalo yokukhankasekela ukuthola amavoti ngokhetho, yehlule njengoba, odobhe ucingo ekhethe ukungathatshwa ilizwi ethi bakhipha umbiko okubeka sobala ukuthi lesi ngesinye sezibhedlela ezakhiwe phansi kwesivumelwano seUK DFID konke lemali eyasetshenziswayo kwakukhona embikweni abawethula kuvulwa esakuqala eseStoneridge esiseHarare.
Forum