Bathwele nzima abadabuka eZimbabwe kwele Botswana ezandleni zababaqhatshileyo abangabhadalwa iholo ngemfanelo, kukanti abanye balimalela emsebenzini, bephume bengatholanga usizo.
Udaba lukodutshulwa kukaMnunzana Gift Ncube, ezandleni zalowo owaye mqhatshile ngomnyaka ka2013, kwaba ludaba olwethusa inengi. Waqunywa izandla zombili kulandela ukulimala kwakhe.
UNcube wayeqhatshwe yisizalwane seBotswana ukuthi agamule izigodo ensimini, kodwa wathi esiyacela inhlawulo, umqhatshi wakhipha umbhobho wamdubula.
Kungekude, uThulani Moyo wasala engelasandla sokudla ngemva kokuqunywa ngumtshina emsebenzini. Akulasizo alutholayo loba wagijimisana loludaba kumagqwetha.
UMnunzana Meli Fuyana ulokhe elalisiwe esibhedlela sempilo kulandela ukuqamuka kwakhe iqolo emsebenzini kwele Botswana. Inkampani abayisebenzela isimlahlele egangeni.
Lezi ngezinye zesimo abeZimbabwe kwele Botswana abazithola bebhekane lazo.
Inengi ngelisuka ekhaya lizodinga ukuziphilisa kodwa licine libhekane lesimo esephula inhliziyo.
Abanye, ikakhulu abangena kwele Botswana bengelamaphepha, abahlawulwa, abaqatshi bethembe ukuthi bayababophisa.
UMnunzana Gilbert Ndlovu wangena kwele Botswana ezodinga umsebenzi, kodwa khathesi kasenelisi ukuhamba, Uzasesebinzisa isitulo samavili, iwheel-chair, okwempilo yakhe yonke. Wabhaxabulwa kabuhlungu ngemvubu enduneni kuthiwa udale icala.
“Njengoba sonke sikwazi ukuthi ekhaya kuwome njani, ungena lapha uzosebenza. Manje nxa ungelamaphepha uyasebenza awusabhadalwa. Uma sekumele uthole imali bayakutshela ukuthi awulamaphepha bangakubophisa. Yinto ebuhlungu kakhulu.”
Umfowabo kaGilbert, uGiven, uthi ukulimala kwakhe kuba nzima okwenza ukuthi imuli icine ikhangele yena, kodwa bona bengene eBotswana besithi bazophandela imuli zabo.
“Ukulimala kwakhe kwahle kwantshintsha impilo yakhe, sefuna ukuhlala encediswa ngayo yonke into. Impilo yakhe isinzima kakhulu.”
UMnunzana Mbonisi Fuyana, umalume kaMeli Fuyana, laye uhlaba umkhosi ngokwenzakala kumzukulu wakhe. Ufunga esithi khona ezangena kwele Botswana ukuzabhekana mathupha lababemqhatshile. UMeli usanda kukhitshwa esibhedlela eseNyangabgwe eFrancistown wasiwa eMpilo, lapho alokhe elalisiwe khona eqamuke iqolo.
“Sizwa ubuhlungu kakhulu ngendlela okwenzeka ngakhona. Ngemva kokulimala ikampani yahle yamlahla. Siyaza abantwana bagcwele indawo yonke ngenxa yesimo esikhona eZimbabwe. Mhlawumbe ikampani yathatha ithuba ukuthi umzukulu kalamaphepha.”
UFuyana uqhubeke esithi udaba lolu bazazama ukulugijimisa bengasoke bayekele okunjenga lokhu okwenziwa ngabanye. Ukhala lango sizo ukuthi uMeli ayeneliswe ukuyahlinzwa,- ioperation.
“Ikampani ngemva kwe operation, sizathi ukuyiqoqodela ngoba ngokutsho kwamadokotela yisimo esingamanga kahle okokuthi kuzamthatha isikhathi eside ukuthi asile.”
Ummeli weZimbabwe kwele Botswana, uMnunzana Henry Mukonoweshuro, uthi liyakhuphuka inani labalimala kwele Botswana ababika isimo sabo emawofisini akhe.
“Njengoba usazi ukuthi ihofisi yommeli weZimbabwe ngaphi langaphi yabunjelwa ukuncedisa izizalwane zeZimbabwe, lathi sesinanzelele ukuthi abeZimbabwe bayabika indaba ezifana lokuthi bayahlukuluzwa ngabaqhatshi.”
UMukonoweshuro uthi sebenanzelele ukuthi labo abahlukumezwayo kakhulu ngabangalamaphepha apheleleyo awokuhlala kumbe ukusebenza kwele Botswana.
“Bathatha ithuba lokubaphatha kabi ngoba bekwazi ukuthi abalamaphepha. Kodwa ukungabi lamaphepha akutsho ukuthi awulamalungelo njalo uma uqhatshe umuntu kumele umhlawule njengesivumelwano.”
Inengi liyazama ukuphanyeka indaba zokuhlukunyezwa emthethwandaba kodwa abanye baphuma bengaphathanga lutho. Kodwa okuthembisayo yikuthi abafana loGift Ncube kanye loGilbert Ndlovu bathola okokwesula inyembezi. Inhlanganiso ebona ngabangena kwamanye amazwe besiyadinga imsebenzi, eyeInternational Organisation for Migration, ithi emhlabeni wonke jikelele, izisebenzi zokuza - ama migrants - lokhe zibhekane lobunzima bokuhlukuluzwa njalo besentshenziswa njengeziqgili.
Forum