BULAWAYO — Liqhuba nzima iqembu labesifazane elimela iZimbabwwe emdlalweni wokuqaga eliphatheke kumncintiswano wokudinga intshantshu zomhlaba jikelele oqhutshelwa kweleSouth Africa.
Iqembu leZimbabwe elaziwa kakhulu ngegama elithi Gems linqotshwe nge 86 ka 30 ngeleAustralia ngoLwesihlanu emdlalweni walo wakuqala kwathi namhla ekuseni litshaywe nge 52 ka 48 ngeleFiji emdlalweni walo wesibili.
Intathelizindaba yezemidlalo uWashington Sibanda uthi sekungenzakala ukuba iqembu leZimbabwe liphutshe imidlalo yesibaya sikaGroup A lingazange linqobe.
“Kuzamele iqembu leZimbabwe lidonse gadalala ukuze linqobe eleTonga kusasa kodwa amathuba akhona avele mancane ngoba eleTonga liqine ukwedlula eleFiji leli elibanqobe namhla. Bekumele sinqobe eleFiji elingaphansi kwethu kumaWorld Rankings ukuze siyale silokhu silethuba elokuncintisa ukuphakamisa isicoco,” kutsho uSibanda.
Ocubungula ezemidlalo uThandiwe Moyo uthi bekuvele kuzakuba yisimanga ukuba iqembu leZimbabwe lenze kuhle kulumncintiswano.
“Okunye kumele sikhangele indlela abalungeselele ngayo ngoba akuhambanga kuhle. Kungasake kuthi laba abazinkokheli zomdlalo bekulungisise khonokho kwelakusasa,” kutsho uNkosazana Moyo.
Kulamaqembu alitshumi lesithupha afakwe kuzibaya ezine kulumncintiswano njalo lawo azaphutsha esendaweni ezintathu eziphezulu kusibaya sikaGroup A lesikaGroup B azabumba isibaya esitsha esika Group F. Lawo azaphutsha esendaweni ezintathu kusibaya sikaGroup C laku Group D azabumba isibaya sikaGroup G.
Amaqembu azaphutsha esendaweni ezimbili eziphezu kwengalane kusibaya sikaGroup F loGroup G azadlulela kusigaba esilandelayo kumncintiswano ese semi – final kuthi azaphumelela lapho ahlangane kufinal.
Lawo amaqembu azaphutsha esemsileni kuzibaya ezithi Group A, B, C kanye loD wona azabumba isibaya sikaGroup E lapho ayabe eselwisa khona ukungabi yiwo azaphutsha esemsileni ekupheleni komncintiswano ngoba kuzamele kucace ukuba amaqembu ami njani kusukela kwelinqobileyo kuze kufike kweliphutshe lisemsileni.
Kusenjalo, umqeqetshi weqembu leHighlanders uBaltemar Brito uthi bakhangelele umdlalo onzima ngeSonto lapho abazavakatshela khona iqembu leNgezi Platinum Stars lona abatshikilisana lalo phezu kwengalane yemiklomelo kusigaba seCastle Lager Premier Soccer League.
“Abafana balungiselele belamadlabuzane ngoba siyakwazi phela ukuba umdlalo esiwulandayo uyabe ungekho lula njengoba sidlala leqembu elihlezi endaweni yesibili engalaneni yemiklomelo.
Labo abeNgezi kumele ukuthi balungiselele kakhulu yikho sikhangelele umdlalo ozakuba mnandi,” kutsho uBrito.
Iqembu leNgezi Platinum Stars leleHighlanders azadlalela enkundleni yeBaobab kusasa ngeSonto ikanti imidlalo ebikhona namhla iphele kanje; iqembu leChicken Inn linqobe ele Hwange nge 2 ka 1 ngaseLuveve, iqembu leManica Diamonds libhaxabule ele Bulawayo Chiefs 3 ka 1 ngaseGibbo, iqembu leZPC Kariba linqobe ele Cranborne Bullets 1 ka nya ngaseNyamhunga, iqembu leFC Platinum linqotshwe 2 ka 1 ngele Sheasham ngaseMandava.
Kweminye imidlalo yangeSonto iqembu leBlack Rhinos lizadlala leleSimba Bhora ngaseBata, iqembu leDynamos lizangqikilana leleYadah ngaseBarbourfields, iqembu leTriangle lizemukela eleGreen Fuel ngaseGibbo kuthi eleHerentals lizadlala leleCaps United ngaseMandava.
Forum