GWANDA - Abamabandla ezombusazwe atshiyeneyo kanye labamabandla ezokholo bafole emigwaqweni namuhla eGwanda bekhankasela ukuthi kuqhutshwe ukhetho olulokuthula lonyaka.
Abasekeli bamabandla agoqela eleZanu PF, Citizens Coalition for Change, ZAPU, Mthwakazi Republic Party, MDC-T kanye leUnited Zimbabwe Alliance baphatheke kulumkhankaso, obuqoqwe yinhlanganiso yamakholwa eyeZimbabwe Christian Alliance.
Bakhulume ngazwi linye abamele amabandla atshiyeneyo besithi akumelanga kube lodlame ngesikhathi sokhetho.
UMnu. Thulani Moyo, olilunga lebandla leZanu PF, uthi uzulu kumele akhumbule ukuthi ukhetho oluzayo alunjengomdlalo wenqindi.
“Asomncintiswano yokulwa ngumncintiswano yokukhetha abakhokheli abaqotho, abalentuthukho, phansi izikhali kasingalwini ngazo izikhali , asisebenziseni iminwe yethu ukuyavotwa ngokuthula singaxabani, ubuntu bethu njengamajahunda bumele busale.”
UMnu. Dingilizwe Ndlovu, obemele ibandla leCCC, laye uthi kubalulekile ukuthi uzulu avote ekhululekile kukhetho oluzayo.
“Ukhetho oluzayo yonke umuntu azizwe ekhululekile kubelokuthula esigabeni lolalowo akhethe umunu azamela kuhle kungabi lobudlwangudlwangu kwabanye.”
UMnu. Edmond Xakaxwayo, olilunga lebandla leMthwakazi Republic Party, uthi kubelinyathelo elihle ukuhlanganisa kumkhankaso lo amabandla ezombusazwe atshiyeneyo.
“Abantu balobumbano,lokhu okuze lamaChurch ngenhlangano yabo akekubongwe bakithi thina njengabanikazi bendawo sithi ayihlale phansi ibambe umthetho.”
UMnu. Cannicious Nkala, owebandla leZAPU, uthi uzulu akumelanga aphatheke kudlame.
UMfundisi Nkosikhona Dube, owebandla lezokholo lweSiKhristu eleEvangelical Lutheran Church of Zimbabwe, uthi uzulu akumelanga axabane ngenxa yemibono etshiyeneyo.
“Kube lokuthula esigabeni sakithi, kungabikhona obona omunye olombono otshiyene lowakhe njengesitha kodwa umbone njengomfowenu, lenze konke ngokuthula, sikhankase ngokuthula sivote ngokuthula.”
UMqondisi weZimbabwe Christian Alliance esiqintini seGwanda, uNkosikazi Phathisiwe Dube, uthi bathethe lelinyathelo ukuze bavikele ukuqhamuka kodlame lwezombusazwe oluvame ukubakhona ngales’isikhathi.
“Nxa sekulokulimala sokulokufa kwabantu idevelopment ayisekho njalo lalokhu esiyabe sesikuvotela kuyabe kungasasisizi ngalutho ngoba udlame kwesinye isikhathi kufa inhloko zemuli abantwana basale sebezintandane sekucine kusibanzima elizweni ukunakekela lezontandane yikho okusenze saphakama njengebandla.”
Lanxa bekungakaqhamuki udlame lwezombusazwe esiqintini seGwanda amanye amabandla aphikisayo akhala ngokuthi abasekeli babo emaphandleni bayethuselwa.
Forum